शिक्रापूर (शेरखान शेख): कोरेगाव भीमा (ता. शिरुर) येथील एक कुटुंब लग्नासाठी बाहेरगावी गेलेले असताना अज्ञात चोरट्यांनी त्यांच्या घराचे कुलूप तोडून सोन्या चांदीचे दागिने तसेच रोख रक्कम चोरुन नेल्याची घटना घडली असल्याने शिक्रापूर पोलीस स्टेशन येथे अज्ञात चोरट्यांवर गुन्हे दाखल करण्यात आले आहे.
कोरेगाव भीमा (ता. शिरुर) येथील फडतरे वस्ती येथे राहणारे उत्तम भोकरे हे घराला कुलूप लावून त्यांच्या कुटुंबियांसह बारामती येथे नातेवाईकांच्या लग्नासाठी गेलेले होते. सकाळच्या सुमारास शेजारील नागरिक उठले असता भोकरे यांच्या घराचे कुलूप तुटलेले व घरातील लाईट सुरु असल्याचे दिसले त्यामुळे शेजारच्यांनी याबाबतची माहिती भोकरे यांना दिली.
दरम्यान भोकरे यांनी घरी येत घरातील पाहणी केली असता सर्व साहित्य अस्ताव्यस्थ पडलेले तसेच कपाट उघडे दिसुन आले. त्यामुळे पाहणी केली असता चोरट्यांनी घरातील तीन तोळे सोन्याचे दागिने, काही चांदीचे दागिने तसेच रोख रक्कम असा अंदाजे 1 लाख 70 हजार रुपयांचा ऐवज चोरुन नेल्याचे दिसून आले.
याबाबत उत्तम केरु भोकरे (वय ६५) रा. फडतरे वस्ती कोरेगाव भीमा (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात चोरट्यावर गुन्हे दाखल केले असून पुढील तपास सहाय्यक पोलीस निरीक्षक वैभव पवार हे करत आहे.
