शिक्रापूर (शेरखान शेख): कान्हूर मेसाई (ता. शिरुर) येथील एका महिलेच्या घराचे कुलूप तोडून अज्ञात चोरट्यांनी घरातील सोन्याचे दागिने व रोख रक्कम चोरुन नेल्याची घटना घडली असल्याने शिक्रापूर पोलीस स्टेशन येथे अज्ञात चोरट्यावर गुन्हे दाखल करण्यात आले आहे.
कान्हूर डमेसाई (ता. शिरुर) येथील पुंडे मळा येथे राहणाऱ्या सुरेखा पुंडे या 4 ऑक्टोबर रोजी घराला कुलूप लावून बाहेर गेलेल्या होत्या दुसऱ्या दिवशी दुपारच्या सुमारास पुंडे या घरी आल्या असता त्यांना दरवाजाचे कुलूप तुटल्याचे दिसून आले. त्यामुळे त्यांनी घरात पाहणी केली असता घरातील साहित्य अस्ताव्यस्थ झाल्याचे तसेच घरात दागिने व पैसे ठेवलेली पिशवी उघडून त्यातील दीड तोळा वजनाचे सोन्याचे दागिने व रोख रक्कम असा अंदाजे 70 हजार रुपयांचा ऐवज चोरीला गेल्याचे दिसून आले.
याबाबत सुरेखा बाळू पुंडे (वय ४१) रा. पुंडे मळा कान्हूर मेसाई (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात चोरट्यांवर गुन्हे दाखल केले असून सदर गुन्ह्याचा पुढील तपास सहाय्यक पोलीस निरीक्षक विक्रम साळुंके व पोलीस नाईक प्रताप कांबळे हे करत आहे.
