शिक्रापूर (शेरखान शेख): करंदी (ता. शिरुर) येथील शिक्रापूर चाकण रस्त्यावर भारत गॅस फाटा परिसरात पहाटेच्या सुमारास चोरीच्या उद्देशाने संशयितपणे फिरणाऱ्या दोघा युवकांना शिक्रापूर पोलिसांनी जेरबंद करत चोरीच्या उद्देशाने फिरणाऱ्या अमीन लाल खान व विजय संजय निकत या दोघांवर गुन्हे दाखल करत त्यांना अटक केली आहे.
शिक्रापूर (ता. शिरुर) पोलीस स्टेशन हद्दीमध्ये पोलीस हवालदार श्रीमंत होनमाने, पोलीस नाईक अमोल दांडगे, जयदीप देवकर व लखन शिरसकर हे रात्रगस्त घालत असताना त्यांना चाकण रोड येथील करंदी फाटा येथे दोन संशयित युवक अंधाराचा फायदा घेऊन लपल्याचे दिसून आले. मात्र पोलीस आल्याचे लक्षात येता ते पळून लावू लागले.
दरम्यान पोलिसांनी त्याला पकडत त्यांच्याकडे चौकशी केली असता ते उडवाउडवीची उत्तरे देऊ लागले तर त्यांच्याकडे वाकड पोलीस स्टेशन हद्दीतून चोरीला गेलेली एक दुचाकी देखील मिळून आल्याने दोघे चोरीच्या उद्देशाने फिरत असल्याचे पोलिसांच्या लक्षात आले.
याबाबत पोलीस शिपाई लखन जनार्दन शिरसकर रा. शिक्रापूर (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अमीन लाला खान (वय २५) रा. कारेगाव (ता. शिरुर) जि. पुणे मूळ रा. भागड ता. जयपूर जि. सैडोहाल मध्यप्रदेश व विजय संजय निकत (वय २१) रा. कारेगाव (ता. शिरुर) जि. पुणे मूळ रा. चोरवड ता. भुसावळ जि. जळगाव या दोघांवर गुन्हे दाखल करत त्यांना त्याला अटक असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस नाईक विकास पाटील हे करत आहे.
