DEATH

सणसवाडीत आढळला अनोळखी व्यक्तीचा मृतदेह

क्राईम

शिक्रापूर (शेरखान शेख): सणसवाडी (ता. शिरुर) येथील पेशवाई हॉटेलच्या शेजारी एका बेवारस व्यक्तीचा मृतदेह आढळून आला असल्याने शिक्रापूर पोलीस स्टेशन येथे आकस्मात मृत्यूची नोंद करण्यात आली आहे.

सणसवाडी (ता. शिरुर) येथील पुणे नगर महामार्गालगत हॉटेल पेशवाईच्या शेजारी एक व्यक्ती मृतावस्थेत पडल्याची माहिती शिक्रापूर पोलिसांना मिळाली. त्यानंतर पोलीस हवालदार आजिनाथ शिंदे यांनी सदर ठिकाणी जात पंचनामा केला असता तेथे अंदाजे अंदाजे ४० ते ४५ वर्षे, रंग काळा, टक्कल केलेला, काळे पांढरे केस, अंगात निळ्या रंगाचा बनियन, खाकी रंगाची प्यांट, कमरेला पट्टा असल्याचे दिसून आले. यावेळी पोलिसांनी आजूबाजूला सदर इसामाबाबत चौकशी केली असता काहीही माहिती मिळू शकली नाही.

याबाबत सणसवाडीचे पोलीस पाटील दत्तात्रय ज्ञानेश्वर माने (वय ४०) रा. सणसवाडी (ता. शिरुर) जि. पुणे यांनी शिक्रापूर पोलीस स्टेशन येथे खबर दिली असल्याने शिक्रापूर पोलिसांनी आकस्मात मृत्यूची नोंद केली असून सदर इसमाबाबत कोणासही काही माहिती असल्यास शिक्रापूर पोलिसांशी ०२१३७२८६३३३ या क्रमांकावर संपर्क करण्याचे आवाहन शिक्रापूर पोलिसांनी केले आहे.