लोणीकंद : सार्वजनिक नळावर पाणी भरताना झालेल्या भांडणात एकाने पोटात लाथ मारल्याने महिलेचा गर्भपात झाला आहे. याप्रकरणी एका २५ वर्षाच्या महिलेने लोणीकंद पोलीस ठाण्यात तक्रार दिली आहे.
पोलिसांनी रोहित रवी धोत्रे, रवी धोत्रे आणि शांताबाईल रवी धोत्रे (सर्व रा. गोरेवस्ती गायरान, वाघोली) यांच्यावर गुन्हा दाखल करण्यात आला आहे. वाघोलीत १५ जुलै रोजी सकाळी ७ वाजता हा प्रकार घडला होता.
पोलिसांनी दिलेल्या माहितीनुसार, फिर्यादी या घराजवळील सार्वजनिक नळावर पाणी भरत असताना त्यांच्या शेजारील रोहित धोत्रे याने फिर्यादीचा नळाखालील हंडा बाजुला सरकवला. त्यावर फिर्यादी यांनी त्याला माझा नंबर आधी आहे. तू मला पाणी भरु दे. माझे झाल्यानंतर तू पाणी भर असे सांगितले. त्यावर तो शिवीगाळ करु लागला. त्याचे वडिल रवी धोत्रे व आई शांताबाई धोत्रे हे सुद्धा तेथे आले. तेही शिवीगाळ करुन दमदाटी करु लागले. त्यावर फिर्यादीने माझा नंबर पहिला आहे, मी पाणी भरते, त्यानंतर तुम्ही पाणी भरा, असे सांगितले. तेव्हा रोहित याने त्यांच्या गालावर चापट मारली. त्याच्या आई वडिलांनी हाताने मारहाण केली.
रोहित याने त्यांच्या पोटावर लाथ मारहाण केल्याने त्या नळाजवळ पडल्या. त्यामुळे त्यांच्या पोटात दुखू लागले. त्यांना ससून रुग्णालयात दाखल केल्यावर डॉक्टरांनी गर्भपात झाल्याचे सांगितले. पोलिसांनी तिघांवर गुन्हा दाखल केला केला आहे. पोलिस पुढील तपास करत आहेत.
