रांजणगाव गणपती (तेजस फडके): रांजणगाव गणपती परिसरात प्लॉट देण्याच्या नावाखाली सर्वसामान्य नागरिकांची आर्थिक लुट सुरु असल्याचा खळबळजनक प्रकार उघडकीस आला आहे. स्वतःचे घर घेण्याच्या स्वप्नासाठी कष्ट करणाऱ्या रांजणगाव एमआयडीसीतील तरुण कामगाराची एका प्लॉट मालकाकडुन फसवणुक करण्यात आली. मात्र गोरगरिबांचे खरे आधारस्तंभ म्हणून ओळखले जाणारे बापूसाहेब शिंदे यांच्या हस्तक्षेपामुळे एका कुटुंबाचे आयुष्य उद्ध्वस्त होण्यापासुन वाचले असुन, १५ लाख रुपयांची परतफेड मिळाली आहे.
मूळचे श्रीपुर (ता. माळशिरस, जि. सोलापुर) येथील रहिवासी असलेले विश्वास राऊत, सध्या रांजणगाव एमआयडीसीतील खासगी कंपनीत काम करतात. आयुष्यभराची कमाई आणि नातेवाइकांकडून उसनवारी करुन त्यांनी रांजणगाव गणपती येथे एक गुंठा प्लॉट घेण्याचा निर्णय घेतला. प्लॉटधारकाने तो NA असल्याचे खोटे सांगत, बनावट कागदपत्रांच्या आधारे १६ लाखांचा व्यवहार उरकला.
त्यानंतर ते खरेदी-खतासाठी गेले असता आधी साईट बंद असल्याचे कारण दिले, तर सायंकाळी अचानक साईट उघडुन घाईघाईत व्यवहार लादण्यात आला. कोणतीही कागदपत्रे वाचू न देता खरेदी-खत न करता फक्त साठेखत व कुलमुख्तार करुन घेण्यात आले. काही दिवसांतच हा प्लॉट NA नसल्याचे उघड झाल्याने मोठी फसवणुक समोर आली.
प्लॉटच्या मालकाला पुर्ण रक्कम दिल्यानंतरही कागदपत्रे देण्यात टाळाटाळ सुरू झाली. सात-आठ दिवसांच्या पाठपुराव्यानंतर जे कागद हाती लागले, त्यांनी फसवणुकीची खात्री केली. पैसे परत मागितले असता प्लॉटधारकाने, “तुला जे करायचं ते कर, पैसे परत मिळणार नाहीत,” असा दम देत दादागिरी केली.
या फसवणुकीमुळे विश्वास राऊत मानसिक तणावाखाली गेले. कुटुंब उद्ध्वस्त होण्याच्या मार्गावर होते; क्षणभर आयुष्य संपवावे असेही वाटले. मात्र कुटुंबाच्या आधारावर त्यांनी धीर धरला. मित्राच्या माध्यमातुन त्यांची भेट बापूसाहेब शिंदे यांच्याशी मातोश्री भवन कार्यालयात झाली.
संपुर्ण प्रकार ऐकून घेतल्यानंतर बापूसाहेब शिंदे यांनी संबंधित प्लॉटधारकाला थेट फोन करत फसवणुक खपवुन घेतली जाणार नाही, असा थेट इशारा दिला. त्यांच्या ठाम आणि निर्भीड भुमिकेमुळे घाबरलेल्या प्लॉट मालकाने सदर युवकाला स्वतःहुन फोन करुन पैसे घेऊन जाण्यास सांगितले. अखेर १६ लाखांपैकी १५ लाख रुपये पीडित युवकाला परत मिळाले.
या घटनेनंतर विश्वास राऊत यांनी आई-वडील, पत्नी व लहान मुलासह बापूसाहेब शिंदे यांचा सत्कार केला. यावेळी भावना व्यक्त करताना ते म्हणाले, “आई-वडील माझे पहिले गुरु आहेत; पण माझ्या कुटुंबाला वाचवणारे बापूसाहेब शिंदे हे माझ्या आयुष्यातील दुसरे गुरु आहेत,” असे त्यांनी डोळ्यात पाणी आणुन सांगितले. या प्रकरणामुळे रांजणगाव गणपती तसेच परिसरातील प्लॉटींग व्यवहारांवर गंभीर प्रश्नचिन्ह निर्माण झाले असुन, प्रशासनाने अशा फसवणुक करणाऱ्यांवर तात्काळ कठोर कारवाई करावी, अशी जोरदार मागणी होत आहे.
