शिक्रापूर (ओमकार भोरडे): गणेश उत्सवाच्या पार्श्वभूमीवर शिक्रापूर पोलिस स्टेशनने हद्दीतील सर्व गणेश मंडळांना महत्त्वाची सूचना दिली आहे. उत्सव काळात डीजे, डॉल्बी, लेझर लाईट आदींवर संपूर्ण बंदी घालण्यात आली असून नियमांचे उल्लंघन करणाऱ्यांवर कठोर कायदेशीर कारवाई केली जाणार असल्याचे शिक्रापूर पोलीस स्टेशनचे पोलीस निरीक्षक दीपरतन गायकवाड यांनी स्पष्ट केले आहे.
गावातील गणेशोत्सव शांततेत आणि पारंपरिक पद्धतीने पार पडावा यासाठी पोलिसांनी विशेष आवाहन केले आहे. डीजे, डॉल्बीच्या प्रचंड आवाजामुळे होणारे ध्वनीप्रदूषण तसेच नागरिकांच्या आरोग्यावर होणारे परिणाम लक्षात घेऊन हा निर्णय घेण्यात आला आहे.
पोलिस निरीक्षक दिपरतन गायकवाड यांनी सांगितले की, “गणेशोत्सव हा भक्ती, श्रद्धा आणि आनंदाचा सोहळा आहे. मात्र यातून कुणालाही त्रास होऊ नये म्हणून पारंपरिक वाद्यांचा वापर करूनच उत्सव साजरा करावा. नियमांचे उल्लंघन करणाऱ्यांवर कोणतीही दया दाखवली जाणार नाही.”शिक्रापूर पोलिसांनी सर्व गणेश मंडळांना दिलेल्या सूचना काटेकोरपणे पाळण्याचे आवाहन केले असून, नागरिकांमध्येही या निर्णयाचे स्वागत होत आहे.
