शिरुर (अरुणकुमार मोटे) शिरुर तालुक्यातील म्हसे येथे मीना कालव्याच्या कॅनॉलचे पाणी रविवार(दि 23) तुंबले गेल्याने “मीना कालवा फुटून शेतात पाणी, शेतकऱ्यांच्या कांदा पिकाचे नुकसान” झाल्याची बातमी “शिरुर तालुका डॉट कॉम” ने प्रसिद्ध करताच पाटबंधारे विभागाचे उपविभागीय अधिकारी आर जी हांडे, शाखाधिकारी एस टी दाते, पाणी वापर संस्थेचे अध्यक्ष रोहिदास मुसळे आणि मीना कालवा टाकळी हाजी कार्यालयाचे कर्मचारी यांनी घटनास्थळी तातडीने धाव घेत शेतकऱ्याच्या नुकसानीची पाहणी केली आहे.
रविवार (दि 23) रोजी मिना कालव्याचा कॅनॉल फुटून शेतात पाणी घुसल्यामुळे शेतकऱ्यांचे जे नुकसान झाले आहे. त्याचा पंचनामा करुन नुकसान भरपाई मिळवून देण्यासाठी वरिष्ठ कार्यालयाशी संपर्क साधून माहिती दिली आहे. उपविभागीय अधिकारी यांनी घटनास्थळी भेट दिली आहे, पंचनामा करण्यासाठी तलाठी व कृषी सहाय्यक आज सोमवार (दि 24) रोजी उपलब्ध नसल्यामुळे मंगळवारी (दि.२५) रोजी पंचनामा केला जाईल असे टाकळी हाजी कार्यालयाचे शाखाधिकारी एस. टी. दाते यांनी सांगितले आहे. आम्हाला कांद्याची नुकसान भरपाई मिळावी तसेच कॅनॉलची दुरुस्ती करण्यात यावी अशी मागणी येथील बाधित शेतकरी निळू चोरे यांनी केली आहे.
