पिंपरी: आपण लग्न करणार आहोत, तु माझी बायको आहे असे बोलून लग्नाचे आमिष दाखवत एका अल्पवयीन मुलीवर बलात्कार केल्याची घटना पिंपरी चिंचवडमध्ये उघडकीस आली आहे.
शारीरिक संबंधातून मुलगी गरोदर राहिल्यानंतर हा प्रकार समोर आला. याबाबत पवन उर्फ गुरु कैलास ओव्हाळ याच्यावर हिंजवडी पोलीस ठाण्यात IPC 376, 376 (2) (एन) सह बालकांचे लैंगिक अत्याचारापासून संरक्षण कायद्यानुसार गुन्हा दाखल करण्यात आला आहे.
याबाबत पीडित मुलीच्या आईने (वय ४२) हिंजवडी पोलीस ठाण्यात शुक्रवारी (दि. ३) रोजी फिर्याद दिली आहे. पोलिसांनी पवन उर्फ गुरु ओव्हाळ (वय १९) रा. थेरगाव, मुळ रा. बीड) याच्यावर गुन्हा दाखल केला आहे. आरोपीवर सांगवी पोलीस ठाण्यात आर्म अ‍ॅक्ट चा गुन्हा दाखल असून या गुन्ह्यात तो कारागृहात आहे.
आरोपीने फिर्यादी यांच्या १५ वर्षाच्या अल्पवयीन मुलीला लग्नाचे आमिष दाखवले. तिच्याशी जवळीक साधली. ‘आपण लग्न करणार आहोत, तु माझी बायको आहे’, असे बोलून त्याने मुलीसोबत वारंवार शारीरिक संबंध ठेवले. यातून अल्पवयीन मुलगी गरोदर राहिली. तिला मुल होऊन त्याचा देखील मृत्यू झाला. पुढील तपास महिला पोलीस उपनिरीक्षक एस. जे. गोडे करत आहेत.
