दिल्ली : भारतीय कुस्ती महासंघाचे माजी अध्यक्ष आणि भाजपचे माजी खासदार ब्रिजभूषण शरण सिंह यांच्या निर्दोष सुटकेच्या निर्णयाला महिला कुस्तीपटूंनी वरिष्ठ न्यायालयात आव्हान दिले आहे. लैंगिक छळाच्या आरोपांप्रकरणी ३ ऑगस्ट रोजी राऊस ॲव्हेन्यू कोर्टाने ब्रिजभूषण शरण सिंह आणि तत्कालीन WFI सहाय्यक सचिव विनोद तोमर यांची सुटका केली होती. त्यानंतर कुस्तीपटूंनी या निर्णयाविरोधात दिल्लीतील सत्र न्यायालयात पुनरीक्षण याचिका दाखल केली आहे.या याचिकेवर शनिवारी सकाळी १० वाजता राऊस ॲव्हेन्यू कोर्टातील विशेष न्यायाधीश दिग्विजय विनय सिंह यांच्यासमोर सुनावणी होणार असल्याची माहिती समोर आली आहे.
‘आदर्श पीडित’ संकल्पनेवर आक्षेप
कुस्तीपटूंनी कनिष्ठ न्यायालयाच्या निकालावर आक्षेप घेताना, निर्णयात ‘आदर्श पीडित’ या पूर्वग्रहदूषित संकल्पनेचा आधार घेतल्याचा दावा केला आहे. लैंगिक छळाला सामोरे गेलेल्या व्यक्तीने तात्काळ विरोध करावा, घटनेची अचूक तारीख-वेळ लक्षात ठेवावी आणि आरोपीपासून लगेच संबंध तोडावेत, अशी अपेक्षा करणे योग्य नसल्याचे त्यांचे म्हणणे आहे.याचिकेनुसार, घटनेनंतर भीती, दबाव, सामाजिक परिस्थिती आणि करिअरवर होणाऱ्या परिणामांमुळे पीडित व्यक्तीची प्रतिक्रिया वेगळी असू शकते.
‘अचूक तारीख आठवली नाही म्हणून आरोप खोटे ठरत नाहीत’
कुस्तीपटूंनी असा दावा केला आहे की, कथित घटनांची अचूक तारीख किंवा वर्ष आठवण्यात झालेल्या तफावतीला कनिष्ठ न्यायालयाने अधिक महत्त्व दिले. मात्र, एखाद्या घटनेचा मानसिक परिणाम लक्षात घेता प्रत्येक तपशील कॅमेऱ्याच्या अचूकतेने आठवणे अपेक्षित नसल्याचे याचिकेत नमूद करण्यात आले आहे.
तसेच, ब्रिजभूषण हे त्या काळात कुस्ती महासंघाचे प्रमुख असल्याने खेळाडूंच्या कारकीर्दीवर त्यांचा प्रभाव होता. त्यामुळे करिअर धोक्यात येण्याच्या भीतीने तातडीने तक्रार न करणे किंवा व्यावसायिक संबंध कायम राहणे, हे आरोप खोटे असल्याचा थेट पुरावा मानता येणार नाही, असा युक्तिवाद करण्यात आला आहे.
कनिष्ठ न्यायालयाच्या निकालात काय म्हटले होते?
३ ऑगस्टच्या आदेशात अतिरिक्त मुख्य महानगर दंडाधिकारी अश्विनी पंवार यांनी तक्रारदारांच्या जबाबांमध्ये काही महत्त्वाच्या विसंगती असल्याचे नमूद केले होते. घटनास्थळ, देश आणि वर्ष याबाबतच्या बदलत्या माहितीकडे न्यायालयाने लक्ष वेधले होते. न्यायालयाने या विसंगतींना सरकारी पक्षाच्या प्रकरणासाठी गंभीर मानले.
न्यायालयाने काही तक्रारदारांनी ब्रिजभूषण यांच्याशी कथित घटनांनंतरही सौहार्दपूर्ण संबंध ठेवल्याचाही उल्लेख केला होता. सहा तक्रारदारांपैकी दोन नंतर आपल्या जबाबांपासून मागे हटले, तर तिसऱ्या तक्रारदाराच्या प्रकरणात आरोप निश्चित झाले नव्हते.
तीन वर्षे चालला खटला
या प्रकरणात २०२३ मध्ये गुन्हा दाखल झाल्यानंतर पोलिसांनी ब्रिजभूषण यांच्याविरोधात आरोपपत्र दाखल केले होते. खटल्यादरम्यान एकूण ३२ सरकारी साक्षीदारांची तपासणी झाली. दोन महिला कुस्तीपटूंनी श्वास तपासण्याच्या बहाण्याने अनुचित स्पर्श केल्याचा आरोप केला होता.आता या प्रकरणातील पुढील कायदेशीर लढाई सत्र न्यायालयात सुरू झाली असून, कुस्तीपटूंच्या पुनरीक्षण याचिकेवर शनिवारी होणाऱ्या सुनावणीकडे लक्ष लागले आहे.
