मुंबई: भारतीय जनता पक्षाचे राष्ट्रीय अध्यक्ष नितीन नबीन यांनी बुधवारी मुंबईतील देवगिरी या शासकीय निवासस्थानी उपमुख्यमंत्री सुनेत्रा अजितदादा पवार यांची सदिच्छा भेट घेतली. या भेटीदरम्यान महाराष्ट्रातील विविध विषयांसह राज्यात सुरू असलेल्या विकासकामांवर सविस्तर चर्चा झाली.यावेळी नितीन नबीन यांनी दिवंगत अजित पवार यांच्या प्रतिमेला पुष्प अर्पण करून अभिवादन केले. त्यानंतर सुनेत्रा पवार यांच्याशी राज्यातील विविध घडामोडी आणि विकासकामांबाबत संवाद साधला.
या भेटीवेळी मुख्यमंत्री देवेंद्र फडणवीस, राष्ट्रवादी काँग्रेसचे कार्याध्यक्ष प्रफुल पटेल, मंत्री मंगल प्रभात लोढा, युवा नेते खासदार पार्थ पवार, भाजपचे प्रदेशाध्यक्ष रवींद्र चव्हाण, भाजपचे मुंबई अध्यक्ष आमदार अमित साटम, राष्ट्रवादी काँग्रेसचे कोषाध्यक्ष आमदार शिवाजीराव गर्जे, आमदार प्रतापराव चिखलीकर, आमदार संजय बनसोडे आदी उपस्थित होते.भाजपचे राष्ट्रीय अध्यक्ष म्हणून नितीन नबीन यांच्या महाराष्ट्र दौऱ्याच्या पार्श्वभूमीवर झालेल्या या भेटीला राजकीयदृष्ट्याही महत्त्व प्राप्त झाले आहे.
