पुणे: पुणे शहरात बेशिस्त वाहनचालकांच्या गैरव्यवहारामुळे नागरिकांचा जीव धोक्यात असल्याचे दिसून आले आहे. ट्रिपलशीट, नो एंट्रीतून वाहन चालवणे, राँग साईड ड्रायव्हिंग, धोकादायक वाहन चालवणे, मोबाईलवर बोलत वाहन चालवणे, फुटपाथवर पार्किंग आणि सिग्नल जंपिंग यासारख्या गंभीर नियमभंगांवर पुणे पोलिसांनी विशेष लक्ष केंद्रीत केले आहे.
पोलिस आयुक्त अमितेश कुमार यांच्या मार्गदर्शनाखाली गेल्या वर्षभरात शहरातील बेशिस्त वाहनचालकांविरुद्ध कठोर कारवाई राबवण्यात आली. यामध्ये दंड, वाहन जप्ती आणि परवाना निलंबन यासारख्या उपाययोजना केल्या गेल्या. विशेषतः ट्रिपलशीट व राँग साईडमुळे होणाऱ्या अपघातांची संख्या लक्षात घेता ‘झिरो टॉलरन्स’ धोरण राबविण्यात आले आहे.
पोलिसांच्या प्रयत्नांमुळे शहरातील वाहतूक सुधारली असून, एका संस्थेच्या अहवालानुसार पुणे शहराचा वाहतूक कोंडी क्रमांक सातव्या स्थानावरून पाचव्या स्थानावर आला आहे. शहरातील प्रमुख चौक, बाजारपेठा, शाळा-महाविद्यालय परिसर व रहिवासी भागात विशेष मोहिमा राबवून नियमभंग करणाऱ्यांवर थेट दंडात्मक कारवाई करण्यात आली आहे.
मोहिमेमुळे नागरिकांमध्ये “दंड भरून मोकळे होण्यापेक्षा नियम पाळणेच सुरक्षित” अशी जाणीव हळूहळू निर्माण होत आहे. मात्र, काही ठिकाणी अद्याप नियम मोडणारे चालक आढळत असल्याने पोलिसांनी ही कारवाई सातत्याने सुरू ठेवण्याचा इशारा दिला आहे.
