शिक्रापूर (शेरखान शेख): सणसवाडी (ता. शिरुर) येथे येथे एका युवकाला कोयत्याचा धाक दाखवून गावामध्ये सुखरुप राहण्यासाठी खंडणीची मागणी करत लोखंडी गज व काठीने मारहाण केल्याची घटना घडली असल्याने शिक्रापूर पोलीस स्टेशन येथे केतन गोरक्ष दरेकर, यश गोरक्ष दरेकर व व्यंकटेश चांदोले या तिघांवर गुन्हे दाखल करण्यात आले आहे.
सणसवाडी (ता. शिरुर) येथील श्रीराम मंदिर समोरून सोहम दरेकर हा युवक जात असताना केतन दरेकर, यश दरेकर व व्यंकटेश चांदोले यांनी सोहमला अडवून गावामध्ये कोयत्याचा धाक दाखवून सुखरुप राहायचे असेल तर पैसे दे अशी मागणी केली. दरम्यान सोहम याने पैसे देण्यास नकार दिला असता तिघांनी सोहम याला शिवीगाळ, दमदाटी करत लोखंडी गज व काठीने मारहाण करुन जखमी करत जीवे मारण्याची धमकी देऊन दहशत निर्माण केली.
घडलेल्या प्रकाराबाबत सोहम अरुण दरेकर (वय १७) रा. सणसवाडी (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी केतन गोरक्ष दरेकर, यश गोरक्ष दरेकर व व्यंकटेश चांदोले तिघे रा. सणसवाडी (ता. शिरुर) जि. पुणे यांच्या विरुद्ध गुन्हे दाखल केले असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली पोलीस उपनिरीक्षक अमोल खटावकर हे करत आहे.
