पुणे: पिंपरी चिंचवडमधील अजमेरा नगर परिसरात राहणाऱ्या आदित्य ओगले (वय ८) या चिमुकल्याचा मृतदेह आढळून आल्याने खळबळ उडाली आहे. मागील 2 दिवसांपासून हा मुलगा बेपत्ता होता. आदित्यचा नुकताच मृतदेह सापडल्यानंतर कुटुंबियांना मोठा धक्का बसला आहे.
पोलिसांनी दिलेल्या माहितीनुसार, आदित्य ओगले 2 दिवसांपासून बेपत्ता होता. 2 युवकांनी अपहरण केले होते. त्यावेळी त्याला बेशुद्ध करण्यासाठी त्यांनी क्लोरोफॉर्मचा वापर केला होता. मात्र क्लोरोफॉर्म अतिवापर केला गेल्याने आणि पोत्यात बांधून ठेवल्याने त्यात श्वास कोंडून आदित्यचा जागीच मृत्यू झाल्याची माहिती समोर आली आहे. या सर्व प्रकरणाचा तपास पिंपरी चिंचवड पोलिस करत आहेत.
दरम्यान, पिंपरी चिंचवड शहरावर या घटनेमुळे शोककळा पसरली आहे. आदित्यच्या बेपत्ता होण्याची माहिती अनेकांनी सोशल मीडियावर व्हायरल केली होती. त्यामुळे आरोपी अधिक सावध झाले आणि पकडले जाऊ नये या भीतीने त्यांनी आदित्यची हत्या केली, अशी देखील शक्यता वर्तवली जात होती. पण, या आरोपींनी दिलेल्या कबुलीनंतर सर्वांना धक्का बसला.
पिंपरी चिंचवड पोलिस दलातील सुमारे 200 पोलिस आदित्यचा शोध घेत होते. तपास वेगाने केल्याने ते आरोपीपर्यंत पोहोचले. मात्र, दुर्दैवाने आदित्यला वाचविण्यात पिंपरी चिंचवड पोलिसांना अपयश आले. पोलिसांनी या घटनेचा तपास अतिशय वेगाने करत अपहरणकर्त्या दोन्ही युवकांना अटक केली आहे. याबाबतचा पुढील तपास पोलिस करत आहेत.
