शिक्रापूर (शेरखान शेख): विठ्ठलवाडी (ता. शिरुर) येथील एका शेतकऱ्याला कारखान्यासाठी उसतोड कामासाठी कामगार पुरवितो, असे म्हणून सदर शेतकऱ्याची तब्बल साडेसात लाख रुपयांची फसवणूक केल्याची घटना घडली असल्याने शिक्रापूर पोलीस स्टेशन येथे सोमनाथ शेम्पू सोनवणे या व्यक्तीवर फसवणूक केल्याप्रकरणी गुन्हे दाखल करण्यात आले आहे.
विठ्ठलवाडी (ता. शिरुर) येथील शेतकरी दत्तात्रय गवारी यांचा शेतीसह कारखान्याचे ऊस तोड करुन कारखान्याला देण्याचा व्यवसाय आहे, गवारी यांना नेहमी उसतोडणी साठी कामगार लागत असल्याने ते विविध ठिकाणहून कामगार आणत असतात. गवारे यांची त्यांच्या व्यवसायातून सोमनाथ सोनवणे याच्या सोबत ओळख झालेली होती.
त्यावेळी सोनवणे याने गवारी यांना तुमच्या व्यवसायासाठी तुम्हाला उसतोड कामगार आणून देतो, असे म्हणून कामगारांना उचल द्यावी, लागेल असे म्हणून कामगारांना देण्यासाठी वेळोवेळी तब्बल 7 लाख 50 हजार रुपये घेतले त्यांनतर आज कामगार येतील. उद्या कामगार येतील, असे म्हणत कामगार पुरविण्यास टाळाटाळ केली. त्यानंतर सोनवणे हा पुन्हा गवारी यांना भेटलाच नाही व त्याने कामगार देखील पुरवले नाही त्यामुळे आपली फसवणूक झाल्याचे लक्षात आले.
याबाबत दत्तात्रय निवृत्ती गवारी (वय ५४) रा. विठ्ठलवाडी (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी सोमनाथ शेम्पू सोनवणे रा. कौळाणे ता. मालेगाव जि. नाशिक या व्यक्तीवर फसवणूक केल्याप्रकरणी गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस हवालदार अमोल चव्हाण हे करत आहे.
