शिक्रापूर (शेरखान शेख): वाजेवाडी (ता. शिरुर) गावातील मांजरेवाडी येथील चासकमान कालव्याच्या पाण्यात एका महिलेचा मृतदेह आढळून आल्याने खळबळ उडाली असून शिक्रापूर पोलीस स्टेशन येथे आकस्मात मृत्यूची नोंद करण्यात आली आहे.
वाजेवाडी (ता. शिरुर) गावातील मांजरेवाडी येथील चासकमान कालव्याच्या पाण्यात एका महिलेचा मृतदेह असल्याचे काही नागरिकांना दिसले याबाबतची माहिती मिळताच तंटामुक्ती समितीचे माजी अध्यक्ष कचरुनाना वाजे, पोलीस पाटील सोनाली वाजे, पोलीस हवालदार मंगेश लांडगे, पोलीस शिपाई भास्कर बुधवंत यांनी सदर ठिकाणी जात राजू मांजरे, आबा मांजरे, बंटी मांजरे, यांसह नागरिकांच्या मदतीने सदर मृतदेह पाण्याबाहेर काढत महिलेबाबत आजूबाजूला चौकशी केली असता काही माहिती मिळू शकली नाही.
याबाबत कचरुनाना रामचंद्र वाजे (वय ६५) रा. पाटील वस्ती वाजेवाडी (ता. शिरुर) जि. पुणे यांनी शिक्रापूर पोलीस स्टेशन येथे खबर दिली असल्याने शिक्रापूर पोलिसांनी आकस्मात मृत्यूची नोंद केली असून सदर महिलेचे वाय अंदाजे ४० ते ५० वर्षे, अंगात पिवळ्या रंगाची नववारी साडी, चोकलेटी रंगाचा ब्लाउज, गळ्यात काळी पोत व लाल दोरीमध्ये एक चावी, हातात लाल रंगाच्या बांगड्या असे वर्णन असून कोणासही महिलेबाबत काही माहिती असल्यास शिक्रापूर पोलिसांशी ०२१३७२८६३३३ या क्रमांकावर संपर्क करण्याचे आवाहन पोलिसांनी केले असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली सहाय्यक पोलीस उपनिरीक्षक आजिनाथ शिंदे हे करत आहे.
