युवकांकडून दुचाकीवर फिरत कोयत्याने मारहाण करत दहशतीचा प्रयत्न
शिक्रापूर: तळेगाव ढमढेरे (ता. शिरुर) येथील काही युवकांकडून स्वातंत्र्य दिनाच्या दिवशीच गावामध्ये दुचाकीहून फिरत दहशत निर्माण करुन दोन वेगवेगळ्या ठिकाणी युवकांना मारहाण करण्यात आल्याची घटना घडली असल्याने शिक्रापूर पोलीस स्टेशन येथे ओमकार शेवकर, अदनान शेख, किरण जाधव, श्रीनात सोनटक्के यांसह पाच ते सहा अनोळखी युवकांवर गुन्हे दाखल करण्यात आले आहे.
तळेगाव ढमढेरे (ता. शिरुर) येथील बाजार मैदानाजवळून यश घुमे त्याच्या चुलत भावासह जात असताना ओमकार शेवकर, अदनान शेख सह काही युवक दुचाकीहून आले. त्यांनी काहीही कारण नसताना दहशत निर्माण करत यश सह त्याच्या चुलत भावाला शिवीगाळ, दमदाटी करुन मारहाण करत अदनान शेख याने त्याच्या हातातील कोयत्याने यशला मारहाण करत सर्व युवक निघून गेले.
काही वेळातच सर्व युवकांनी त्यांच्या मोर्चा गुजर प्रशालेकडे वळविला तेथे जात ओमकार शेवकर याने सारंग आल्हाट या युवकाला धक्का देऊन वाद घालत मी काय आहे तुला सांगतो, तू माझ्या ग्रुपचे नाव सोशल मिडीयावर का टाकत नाही, असे म्हणून शिवीगाळ, दमदाटी करत आलेल्या युवकांनी सारंग सह त्याच्या मित्राला मारहाण केली. यावेळी सारंग पळून त्याच्या चुलत्यांच्या घरी गेला असता मारहाण करणाऱ्या युवकांनी तेथे गर्दी करत सारंग आल्हाट सह त्याच्या मित्राला जीवे मारण्याची धमकी दिली.
याबाबत यश संतोष घुमे वय १९ वर्षे व सारंग महेंद्र आल्हाट वय १९ वर्षे दोघे रा. तळेगाव ढमढेरे (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी ओमकार शेवकर, अदनान शेख, किरण जाधव, श्रीनात सोनटक्के यांसह ५ ते ६ अनोळखी युवकांवर गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस हवालदार किशोर तेलंग व अमोल चव्हाण हे करत आहे.
