शिक्रापूर (शेरखान शेख): करंदी (ता. शिरुर) येथील एका हॉटेल मध्ये जेवण करण्यासाठी आलेल्या युवकाचा धक्का लागल्याचा जाब विचारल्याने युवकांमध्ये वादावादी होत काचेच्या बाटलीने मारहाण केल्याची घटना घडली असल्याने शिक्रापूर पोलीस स्टेशन येथे हॉटेल चालकासह चौघांवर गुन्हे दाखल करण्यात आले आहे.
करंदी (ता. शिरुर) येथील ओमसाई हॉटेल मध्ये अभिषेक नाईकनवरे व त्याचा साथीदार विकास काळे हे दोघे जेवण करण्यासाठी गेलेले असताना तेथे जेवण करत असलेल्या 4 व्यक्तीपैकी एकाचा अभिषेकला धक्का लागला त्यामुळे अभिषेकने त्यांना जाब विचारला असता त्यांच्यात वाद झाला. यावेळी त्या चौघा युवकांनी अभिषेक व विकास या दोघांना शिवीगाळ, दमदाटी करत काचेच्या बाटलीने दोघांना मारहाण केली. यावेळी हॉटेल चालक असलेले चलसानी यांनी देखील अभिषेक यास हाताने व लाथाबुक्य्यांनी मारहाण केली. सदर घटनेत अभिषेक अंकुश नाईकनवरे हा जखमी झाला.
याबाबत अभिषेक अंकुश नाईकनवरे (वय २७) रा. धर्मनाथ मंदिरा शेजारी पिंपळे जगताप (ता. शिरूर) जि. पुणे याने शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी हॉटेल ओमसाईचे चालक चलसानी यांच्या सह 4 अनोळखी व्यक्तीवर गुन्हे दाखल केले असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली पोलीस उपनिरीक्षक अविनाश थोरात हे करत आहे.