शिक्रापूर (शेरखान शेख): सणसवाडी (ता. शिरुर) येथील पुणे नगर महामार्गावर असलेल्या एल अँड टी फाटा येथे ट्राफिक वार्डनने गाडी बाजूला घेण्यास सांगितल्याने ट्राफिक वार्डनला मारहाण करण्यात आल्याची घटना घडली असल्याने शिक्रापूर पोलीस स्टेशन येथे दिनेश कंगले व विशाल दरेकर या दोघांवर गुन्हे दाखल करण्यात आले आहे.
शिक्रापूर (ता. शिरुर) पोलीस स्टेशनला ट्राफिक वार्डन म्हणून कार्यरत असलेला राहुल वायकर हा सणसवाडी येथील पुणे नगर महामार्गावर असलेल्या एल अँड टी फाटा येथे वाहतूक नियमनाचे काम करत असताना एक कार मधून दोघेजण आले त्यांनी रस्त्याच्या कडेला कार उभी केली. यावेळी राहुल वायकर याने त्यांना गाडी बाजूला घेण्यास सांगितली असता दोघांनी वार्डन वायकर यास शिवीगाळ, दमदाटी करत लाकडी दांडक्याने मारहाण केली.
याबाबत ट्राफिक वार्डन राहुल कल्याण वायकर (वय ३३) रा. शिक्रापूर (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी दिनेश कंगले व विशाल दरेकर दोघे रा. सणसवाडी (ता. शिरुर) जि. पुणे यांच्या विरुद्ध गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस हवालदार गणेश करपे हे करत आहे.
