शिक्रापूर (शेरखान शेख): तळेगाव ढमढेरे (ता. शिरुर) येथे पहाटेच्या सुमारास फिरायला गेलेल्या व्यक्तीला तिघा अज्ञात युवकांनी मारहाण करत मोबाईल चोरुन नेल्याची घटना घडली असल्याने शिक्रापूर पोलीस स्टेशन येथे 3 अज्ञात युवकांवर गुन्हे दाखल करण्यात आले आहे.
तळेगाव ढमढेरे (ता. शिरुर) दत्तात्रय भुजबळ हे पहाटे चार वाजण्याच्या सुमारास चालायला गेलेले होते. काही अंतर गेल्यावर एका ठिकाणी कट्ट्यावर बसून भुजबळ मोबाईल पाहत असताना तिघे युवक सदर ठिकाणी आले. त्यातील एका युवकाने भुजबळ यांचा मोबाईल ओढण्याचा प्रयत्न केला. त्यावेळी भुजबळ यांनी प्रतिकार केल्याने तिघांनी त्यांना तोंडावर, छातीवर बेदम मारहाण करत त्यांचा मोबाईल काढून घेत पोबारा केला.
घडलेल्या घटनेबाबत दत्तात्रय आनंदराव भुजबळ (वय ५४) रा. कारभारी वस्ती माळीमळा तळेगाव ढमढेरे (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात 3 युवकांवर गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस निरीक्षक अमोल खटावकर हे करत आहे.