सविंदणे (अरुणकुमार मोटे): पिंपरखेड (ता. शिरूर) येथील एका हॉटेलमध्ये घुसून वेटरला मारहाण करून गल्ल्यातील रोकड लंपास केलेल्या जबरी चोरीतील दोन आरोपींना टाकळी हाजी औट पोस्टचे सहाय्यक पोलिस निरीक्षक अमोल पन्हाळकर, पोलिस ऊपनिरीक्षक सुनिल ऊगले, पोलिस नाईक धनंजय थेऊरकर, पोलिस शिपाई विशाल पालवे यांनी गुन्हा दाखल झाल्यानंतर तातडीने हालचाल करून दोन तासाच्या आत बेडया ठोकल्या आहेत.
याबाबत सविस्तर हकीगत अशी की, १५ मार्च रोजी रात्री ०१:०० वा. चे सुमारास हॉटेल बंद झाल्यानंतर विसावा हॉटेल पंचतळे येथे हॉटेलचे मुख्य गेट बंद करून वेटर संदिप भोईर हे वस्ताद आनंद सिंह व बंटी सिंग हे झोपले होते. कृष्णा गुंजाळ व प्रशांत शिरसाठ हे हॉटेलच्या पाठीमागील कंम्पाउंडवरून उडी मारून हॉटेलमध्ये शिरले व गेट वाजवले तरी का उघडले नाही? अशी विचारणा करून शिवीगाळ करू लागले.
सदर वेळी त्यातील एकाने खाली पडलेल्याच मोठ्या लोखंडी उलातण्याने संदिप भोईर याला मारायला सुरवात केली. दरम्यानच त्यातील एकाने त्याला खाली पडून धरले व दुसऱ्याने त्याच्या खिशातील ७,३०० रुपये बळजबरीने काढून घेतले. ही मारामारी सोडवणा-या वस्ताद आनंद सिंह व बंटी सिंग यांनाही त्या दोघांनी हाताने मारहाण केली. तसेच हॉटेल मालक निलेश पळसकर व मॅनेजर हरिष चोरे यांना तुम्हाला आमचे काय वाकडे करायचे ते करा आम्ही कोणालाही घाबरत नाही अशी शिवीगाळ करून निघून गेले होते. या प्रकरणी शिरूर पोलिस स्टेशनमध्ये मारहाण करून जबरी चोरीचा गुन्हा दाखल झाला असून पोलिस उपनिरीक्षक सुनिल उगले हे अधिक तपास करत होते. तपासादरम्यान त्यांना बेड्या ठोकण्यात आल्या आहेत.
पंचतळे परीसरातील जांबुत, पिंपरखेड, चांडोह या भागात कोणी कोणत्याही व्यावसायिकांना धमकावून पैसे उकळून खंडणी मागत असेल अगर त्रास देत असेल तर ताबडतोब पोलिसांशी संपर्क साधावा. तात्काळ दखल घेऊन कठोरात कठोर कारवाई केली जाईल. माहीती देणाऱ्याचे नाव गुपीत ठेवली जाईल, असे आवाहन टाकळी हाजी औट पोस्टचे सहाय्यक पोलिस निरीक्षक अमोल पन्हाळकर, पोलिस ऊपनिरीक्षक सुनिल ऊगले यांनी केले आहे.
