पुणे : कात्रज परिसरात अपघातांची मालिका सुरू असतानाच शनिवारी सकाळी सुमारे नऊच्या सुमारास वंडर सिटीसमोर कात्रजकडे जाणाऱ्या मुख्य रस्त्यावर भीषण अपघात झाला. ट्रक आणि दुचाकी यांच्यात झालेल्या धडकेत तीन वर्षांच्या चिमुकल्याचा दुर्दैवी मृत्यू झाला.
मिळालेल्या माहितीनुसार, वडील आपल्या तीन वर्षांच्या मुलाला दुचाकीवरून घेऊन जात असताना मागून येणाऱ्या ट्रकने जोरदार धडक दिली. या धडकेत चिमुकल्याच्या डोक्यावरून ट्रकचे चाक गेल्याने त्याचा जागीच मृत्यू झाला. मृत मुलाचे नाव अंश भाऊरंग कांबळे (वय ३, रा. अंजनीनगर, कात्रज) असे आहे.या प्रकरणी ट्रक चालक इंद्रजित बाबुराव जानते (वय ५०, रा. निलंगा, लातूर) याला पोलिसांनी ताब्यात घेतले असून पुढील तपास सुरू आहे.
दरम्यान, अवघ्या आठ दिवसांपूर्वी कात्रज डेअरीसमोर झालेल्या अपघातात एका तरुणीचा मृत्यू झाला होता. त्यामुळे कात्रज व परिसरातील वाढते अपघात कधी थांबणार, असा सवाल नागरिकांकडून उपस्थित केला जात आहे.
या मार्गावर अवजड वाहनांची मोठ्या प्रमाणात वर्दळ असते. त्यातच रस्ता निसरडा असल्याने अपघातांची शक्यता अधिक वाढते. यापूर्वीही या ठिकाणी अनेक अपघात होऊन नागरिक जखमी झाले आहेत. त्यामुळे या भागात तातडीने वेगमर्यादा लागू करणे, अवजड वाहनांवर नियंत्रण ठेवणे आणि रस्ता सुरक्षेसाठी आवश्यक उपाययोजना राबविण्याची जोरदार मागणी नागरिकांकडून करण्यात येत आहे.
