धनंजय पोवारने उपस्थित केले प्रश्न
मुंबई: ‘बिग बॉस मराठी चा खेळ सध्या रंगात आला असून दर आठवड्याला नवे ट्विस्ट पाहायला मिळत आहेत. या आठवड्यात घरातील सात सदस्य नॉमिनेट झाले होते. यामध्ये दिपाली सय्यद, रुचिता जामदार, प्राजक्ता शुक्रे, संस्कृती साळुंके, सागर कारंडे, प्रभू शेळके आणि तन्वी कोलते यांचा समावेश होता.
या सात जणांपैकी सर्वांत चर्चेत असलेली स्पर्धक रुचिता जामदार बिग बॉसच्या घरातून बाद झाल्याची माहिती समोर आली आहे. रुचिता टॉप-5 स्पर्धकांमध्ये आपले स्थान पक्के करेल, अशी चर्चा असताना तिच्या एलिमिनेशनने प्रेक्षकांनाही आश्चर्याचा धक्का बसला आहे.
दरम्यान, बिग बॉस मराठीचा माजी स्पर्धक धनंजय पोवार याने यावर प्रतिक्रिया देत आश्चर्य व्यक्त केले आहे. त्याने इन्स्टाग्राम स्टोरीवर व्हिडिओ शेअर करत हा निर्णय पटलेला नसल्याचे म्हटले आहे.
धनंजय पोवार म्हणाला, “सोशल मीडियावर पाहायला मिळालं की रुचिता बाहेर पडली. याआधी रोशन भाजनकर ला खूप मतं मिळाली होती, तरीही तो बाहेर पडला. आता रुचितालाही भरपूर मतं मिळाली होती, असं ऐकायला मिळतंय. कारण मागचा पूर्ण आठवडा तिने बिग बॉसला भरपूर कंटेंट दिला होता. तरीही ती बाहेर गेली, हे थोडं आश्चर्यकारक आहे.”
दरम्यान, घराबाहेर आल्यानंतर रुचिता जामदारने तिच्या इन्स्टाग्रामवर पोस्ट शेअर करत प्रेक्षकांचे आभार मानले. “या घरात प्रत्येक गोष्ट मी मनापासून केली. अनेक वेळा नॉमिनेट झाले तरी प्रेक्षकांच्या प्रेमामुळे मला लढण्याची ताकद मिळाली. घरात माझ्याकडून काही चुका झाल्या असतील तर त्याबद्दल माफी मागते. आजचं एविक्शन माझ्यासाठी आश्चर्यकारक आहे, पण जनतेचा निर्णय मला मान्य आहे,” असे तिने पोस्टमध्ये म्हटले आहे.
