ग्रामीण विद्यार्थिनींसाठी दिलासा ठरणारी ‘सायकल बँक’ योजना सुरू
शिरूर (अरुणकुमार मोटे): पुणे जिल्हा परिषदशिक्षण विभागाच्या वतीने ग्रामीण भागातील गरजू विद्यार्थिनींसाठी ‘सायकल बँक’हा अभिनव आणि हृदयस्पर्शी उपक्रम राबविण्यात येत आहे. “सायकलचा आधार, भविष्याला आकार” या संकल्पनेतून सुरू करण्यात आलेल्या या उपक्रमाचा उद्देश ग्रामीण भागातील मुलींना शिक्षणासाठी प्रोत्साहन देणे हा आहे.
जिल्हा परिषदेच्या शाळांमध्ये ८ वी ते १२ वीमध्ये शिक्षण घेणाऱ्या मुलींना शाळेपर्यंत पोहचण्यासाठी मोठ्या अंतरावरून प्रवास करावा लागतो. यामुळे शिक्षणात अडथळा येतो. या अडचणीवर मात करण्यासाठी जिल्हा परिषदेच्या वतीने सायकल बँक हे प्रभावी साधन म्हणून पुढे आले आहे.
या उपक्रमाअंतर्गत इच्छुक व्यक्ती, संस्था, कंपन्यांनी नवीन सायकली किंवा जुन्या चांगल्या स्थितीत असलेल्या सायकली दान कराव्यात. त्या सायकली संबंधित विद्यार्थिनींना देण्यात येतील.यामुळे गरजूंना सुलभ, सुरक्षित आणि नियमित शिक्षणासाठी मदतीचा हात मिळेल. पुणे जिल्हा परिषदेचे मुख्य कार्यकारी अधिकारी गजानन पाटील यांनी यासाठी पुढाकार घेत समाजाला एक भावनिक आणि सामाजिक आवाहन केले आहे. ज्या व्यक्तींना सायकली दान करायच्या आहेत त्यांनी पंढरी पाटील 9404421427 या क्रमांकावर संपर्क साधण्याचे आवाहन शिरूर चे गटविकास अधिकारी महेश डोके यांनी केले आहे.
