रांजणगाव गणपती (तेजस फडके) शिरुर तालुक्यातील वाघाळे गाव एकदा गुन्हेगारीच्या घटनेने हादरले असुन भरदिवसा एका ज्येष्ठ मेंढपाळावर चाकूने जीवघेणा हल्ला करण्यात आल्याची धक्कादायक घटना समोर आली आहे. या प्रकरणी रांजणगाव पोलिस ठाण्यात गुन्हा दाखल करण्यात आला असून गावात भीतीचे वातावरण निर्माण झाले आहे.
रांजणगाव पोलिसांनी दिलेल्या माहितीनुसार, फिर्यादी नारायण पंडु शिंगाडे (वय ६५, रा. शिंगाडवाडी, पो.वरुडे, ता. शिरुर) यांनी फिर्याद दिली असुन याबाबत राजु प्रभु झिटे (रा. मरीबाई खोरे, शिंगाडवाडी, पो.वरुडे, ता. शिरुर) याच्यावर गुन्हा दाखल करण्यात आला आहे. वाघाळे येथील एका हॉटेल समोर दुपारी चारच्या सुमारास हि घटना घडली.
आरोपी राजु झिटे हा दारुच्या नशेत तेथे आला आणि त्याने फिर्यादी नारायण शिगाडे यांच्यावर थेट चाकूने हल्ला चढवला. आरोपीने शिगाडे यांच्या पोटावर आणि छातीवर वार करत गंभीर दुखापत केली. एवढ्यावरच न थांबता शिवीगाळ, दमदाटी करत “तुला आणि तुझ्या कुटुंबाला जिवंत सोडणार नाही,” अशी धमकी दिल्याचे फिर्यादीत नमूद करण्यात आले आहे.
भर चौकात झालेल्या या गंभीर प्रकारामुळे नागरिकांमध्ये एकच खळबळ उडाली. घटनेनंतर परिसरातील नागरिकांनी जखमी वृद्धाला तातडीने उपचारासाठी रुग्णालयात दाखल केले. या घटनेमुळे ग्रामीण भागातील कायदा-सुव्यवस्थेचा प्रश्न पुन्हा ऐरणीवर आला आहे.या प्रकरणाचा पुढील अधिक तपास पोलीस कर्मचारी संदीप जगदाळे करीत आहेत.
