नवी दिल्ली : स्वातंत्र्यदिनानिमित्त पंतप्रधान नरेंद्र मोदी यांनी लाल किल्ल्यावर ध्वजारोहण करून देशाला संबोधित केले. या राष्ट्रीय सोहळ्यासाठी लोकसभेतील विरोधी पक्षनेते राहुल गांधी आणि काँग्रेसचे राष्ट्रीय अध्यक्ष तसेच राज्यसभेतील विरोधी पक्षनेते मल्लिकार्जुन खर्गे यांनाही निमंत्रण देण्यात आले होते. मात्र, दोन्ही नेते या कार्यक्रमाला उपस्थित राहिले नाहीत.
काँग्रेसच्या या दोन्ही वरिष्ठ नेत्यांनी लाल किल्ल्यावरील सोहळ्याला गैरहजर राहण्यामागील कारण आता समोर आले आहे. ‘आज तक’ने सूत्रांच्या हवाल्याने दिलेल्या वृत्तानुसार, राहुल गांधी आणि मल्लिकार्जुन खर्गे हे सोहळ्यातील बैठक व्यवस्था आणि प्रोटोकॉलवर नाराज असल्याचे सांगण्यात येत आहे.
राष्ट्रीय कार्यक्रमांमध्ये विरोधी पक्षनेत्याला पहिल्या रांगेत स्थान देण्याची परंपरा आहे. मात्र, यंदाच्या स्वातंत्र्यदिन सोहळ्यात लोकसभेतील विरोधी पक्षनेते राहुल गांधी यांच्यासाठी पहिल्या रांगेत स्थान देण्यात आले नसल्याचे वृत्त आहे.
गेल्या वर्षी, 2024 मध्येही राहुल गांधी स्वातंत्र्यदिनाच्या सोहळ्यासाठी लाल किल्ल्यावर उपस्थित होते. त्यावेळी त्यांना चौथ्या रांगेत स्थान देण्यात आले होते. या बैठक व्यवस्थेबाबत त्यांनी नाराजी व्यक्त केली होती. त्यावेळी संरक्षण मंत्रालयाकडून स्पष्टीकरण देताना ऑलिम्पिक खेळाडूंसाठी करण्यात आलेल्या विशेष बैठक व्यवस्थेमुळे आसन व्यवस्थेत बदल करण्यात आल्याचे सांगण्यात आले होते.
दरम्यान, लाल किल्ल्यावरील कार्यक्रमाला गैरहजर राहिल्यानंतर काँग्रेसने दिल्लीतील पक्ष कार्यालयात स्वातंत्र्यदिनाचा कार्यक्रम आयोजित केला. यावेळी राहुल गांधी, काँग्रेस अध्यक्ष मल्लिकार्जुन खर्गे आणि सोनिया गांधी उपस्थित होते.
यावेळी मल्लिकार्जुन खर्गे यांनी आपल्या भाषणातून काँग्रेस ‘Gen-Z’च्या मागे ठामपणे उभी राहील, असे सांगितले. तर राहुल गांधी यांनी सोशल मीडियाच्या माध्यमातून देशवासीयांना स्वातंत्र्यदिनाच्या शुभेच्छा दिल्या.
“आपल्या स्वातंत्र्यसैनिकांनी आपल्याला स्वातंत्र्य मिळवून दिले, हे केवळ एक भेट नसून आपली जबाबदारी आहे,” असा संदेश राहुल गांधी यांनी दिला. सत्य आणि अहिंसेच्या मार्गावर चालणे, संविधान आणि तिरंगा हृदयात ठेवणे तसेच लोकशाहीचे रक्षण करणे हीच या स्वातंत्र्याची खरी जबाबदारी असल्याचे त्यांनी म्हटले.
