शिक्रापूर: शिरुर तालुका माजी सैनिक संघटनेची बैठक नुकतीच संपन्न झाली असून यावेळी शिरुर तालुका माजी सैनिक संघटनेच्या अध्यक्षपदी संभाजी धुमाळ तर उपाध्यक्षपदी भाऊसाहेब सोनवणे यांची निवड करण्यात आली आहे.
शिरुर तालुका माजी सैनिक संघटनेची बैठक ज्येष्ठ माजी सैनिक शिवाजीराव कोहोकडे यांच्या अध्यक्षतेखाली आयोजित करण्यात आली होती. यावेळी माजी सैनिक संघटनेच्या शिरुर तालुकाध्यक्ष पदी संभाजी धुमाळ, उपाध्यक्षपदी भाऊसाहेब सोनवणे, मानद सचिवपदी रावसाहेब आदक, मानद खजिनदार पदी लहू तळोले, सदस्यपदी सुरेश उमाप, राजाराम सांबारे, परशुराम शिंदे, विलास शिवले, नंदकिशोर रोडे, जयसिंग गायकवाड, रमेश खर्डे, सुनील चौधरी, जालिंदर ढमढेरे, सुदाम भुजबळ यांची निवड करण्यात आली.
दरम्यान निवडी नंतर बोलताना संघटनेच्या माध्यमातून माजी सैनिकांच्या समस्या शासन दरबारी मांडून सोडवणार असल्याचे माजी सैनिक संघटनेचे शिरुर तालुकाध्यक्ष संभाजी धुमाळ यांनी सांगितले. सदर कार्यक्रमाचे सूत्रसंचालन रावसाहेब आदक यांनी केले तर प्रास्ताविक माजी सैनिक सुरेश उमाप यांनी केले आणि राजाराम धुमाळ यांनी आभार मानले.
