शिक्रापूर (शेरखान शेख): शिक्रापूर (ता. शिरुर) पोलीस स्टेशनचे औट पोस्ट असलेल्या पाबळ पोलीस चौकीवर मद्यपी व्यक्तीकडून दगडफेक करण्यात आल्याची घटना घडली असल्याने शिक्रापूर पोलीस स्टेशन येथे बाळासाहेब काशिनाथ साकोरे याच्या विरुद्ध गुन्हे दाखल करण्यात आले आहे.
शिक्रापूर (ता. शिरुर) पोलीस स्टेशनचे औट पोस्ट असलेल्या पाबळ पोलीस चौकी येथे पोलीस कर्मचारी काम करत असताना एक मद्यपी व्यक्ती मोठमोठ्याने आरडाओरडा करत पोलीस चौकीच्या आवारात आला. यावेळी पोलीस कर्मचारी त्याला समजावून सांगत असताना त्याने मोठ्याने आरडाओरडा करत शांततेचा भंग करत पोलीस चौकीच्या भिंतींवर दगडफेक केली.
दरम्यान पोलिसांनी त्याला ताब्यात घेतले असून याबाबत पोलीस हवालदार गणेश गुलाबराव सुतार रा. शिक्रापूर (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी बाळासाहेब काशिनाथ साकोरे (वय ५०) रा. महादेववाडी केंदूर (ता. शिरुर) जि. पुणे याच्या विरुद्ध गुन्हे दाखल केले असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली पोलीस हवालदार गणेश सुतार करत आहे.
