शिक्रापूर: शिरुर (ता. शिरुर) येथील बोऱ्हाडे मळा येथे राहणारे सचिन उदार हे (दि. १७) जुलै रोजी सायंकाळच्या सुमारास काही कामानिमित्ताने घराला कुलूप लावून बाहेर गेलेले होते. दुसऱ्या दिवशी सकाळच्या सुमारास घरी आल्यानंतर दरवाजाचे कुलूप उचकटलेले तसेच घरातील सर्व साहित्य अस्थाव्यस्थ पडल्याचे सचिन यांना दिसून आले. त्यामुळे त्यांनी कपाटाची पाहणी केली असता कपाटातील २५ हजार रुपये रोख रक्कम तसेच ३ तोळे सोन्याचे दागिने असा अंदाजे १ लाख ६० हजारांचा ऐवज चोरीला गेल्याचे निदर्शनास आले.
याबाबत सचिन सुभाष उदार (वय ३३) रा. बोऱ्हाडे मळा शिरुर (ता. शिरुर) जि. पुणे यांनी शिरुर पोलीस स्टेशन येथे फिर्याद दिली असल्याने शिरुर पोलिसांनी अज्ञात व्यक्तीवर गुन्हे दाखल केले असून सदर गुन्ह्याचा पुढील तपास पोलीस निरीक्षक सुरेशकुमार राऊत यांच्या मार्गदर्शनाखाली शिरुर पोलीस करत आहे.
