शिरूर (अरुणकुमार मोटे): शिरुर तालुक्यात गॅस टाक्यांच्या रिफिलींगचा काळाबाजार उघड झाला असून, या रिफिलींगसाठी घरगुती गॅस पुरवणाऱ्या एस.डी. दुगड एच.पी एजन्सीवर गुन्हा दाखल झाला आहे. पुढील योग्य ती कारवाई झाली नसून, अजूनही सदरचा एजन्सीधारक गोडावून मधून खुलेआम काळया बाजारात घरगुती गॅसची विक्री करत आहे.
रांजणगावात पोलिस स्टेशनसमोरच हाकेच्या अंतरावर रिफीलींगवाले घरगुती टाकीतून ४ किलोच्या टाकीत दिवसाढवळ्या पुणे-नगर रोडवर हा व्यवसाय करत आहेत. आमचे हप्ते चालू असून आमचे कोणीही वाकडे करु शकत नाही, अशा वल्गना करत आहेत. शिरुर, रांजणगाव, न्हावरे, सोने सांगवी, ढोक सांगवी, कारेगाव, कोरेगाव भीमा येथे रिफिलींग व्यवसाय मोठया प्रमाणावर होत आहे.
पुरवठा विभाग व पोलिस प्रशासन यांना अजूनही जाग आली नसून, अर्थपुर्ण व्यवहारामुळे डोळेझाक करत असल्याची नागरीक चर्चा करत आहेत. पुरवठा विभाग या एजन्सीधारकाचे नदीच्या पलीकडे अहमदनगर जिल्हयात अनाधिकृतरित्या असलेल्या गोडावून वर कारवाई करणार का? या एजन्सीवर पुढील कारवाई टाळण्यासाठी मोठी आर्थिक तडजोड झाल्याची चर्चा शिरूर शहरात होत आहे. संबंधित एजन्सीवर तातडीने तपास करुन आधिकाऱ्यांनी कारवाई न केल्यास योग्य त्या न्यायालयात धाव घेणार असल्याचे नागरीकांनी सांगितले आहे.
शिरूर तालुक्यात अवैधरीत्या गॅस रिफिलींगचा व्यवसाय जोरात सुरू…
