शिंदोडी (तेजस फडके) शिरुर तालुक्यातील घोड धरणातुन गेल्या एक वर्षापासुन वाळू डेपोच्या नावाखाली बेसुमार वाळू उपसा चालु असुन शासनाचा लाखों रुपयांचा महसूल बुडत असताना महसूल विभागाचे अधिकारी व कर्मचारी जाणीवपूर्वक याकडे कानाडोळा करत असुन या वाळू उपशामुळे पुर्णपणे मातीचे धरण असलेल्या घोड धरणाला भविष्यात हानी पोहचण्याची शक्यता आहे.
शिरुर तालुक्याच्या पुर्व भागातील कुऱ्हाडवाडी तसेच चिंचणी या ठिकाणाहुन सध्या रात्रंदिवस वाळू माफिया यांत्रिक बोटीद्वारे वाळू उपसा करत आहेत. सध्या लोकसभा निवडणुकीची रणधुमाळी सुरु झाली असल्याने पोलिस आणि महसूल कर्मचारी निवडणुकीच्या कामात व्यस्त असल्याने वाळू माफिया मोकाट सुटले असुन चिंचणी येथील घोड धरणाच्या अगदी जवळच धोकादायकरीत्या वाळू उपसा केला जात आहे.
वाळू माफीयांचा एकच नारा अपना सपना मनी मनी…
शिरुरच्या पुर्वभागात चिंचणी येथे वाळू डेपोच्या नावाखाली स्थानिक वाळू माफिया बेसुमार वाळू उपसा करत असुन चिंचणी, गुनाट, कुऱ्हाडवाडी येथे नवीन वाळू माफिया उदयास येत असुन भविष्यात याठिकाणी वाळू उपशासाठी जीवघेणा संघर्ष होणार असुन त्यामुळं भविष्यात कायदा व सुव्यवस्था धोक्यात येणार आहे. परंतु पैशाच्या हव्यासापोटी पोलिस आणि महसूल कर्मचारीही याकडे दुर्लक्ष करत आहेत. सध्या मार्च एंड चालु असल्याने पोलिस व महसूल कर्मचारीही ‘अपना काम बनता तो भाड मे जाय जनता’ असे म्हणतं वसुलीत मग्न झाले आहेत.
(क्रमश:)
