मुंबई: नुकतेच उपमुख्यमंत्री एकनाथ शिंदे यांच्या शिवसेनेत प्रवेश केलेले खासदार संजय दिना पाटील यांनी पत्रकारांबाबत वापरलेल्या आक्षेपार्ह, अवमानकारक आणि असंसदीय भाषेचा मुंबई मराठी पत्रकार संघाने तीव्र निषेध केला आहे.
पत्रकारांशी संवाद साधताना खासदार पाटील यांनी “माझे काय करायचे ते करा, समोर पोलीस आहेत, कमिशनरकडे तक्रार करा” अशा स्वरूपाची भाषा वापरल्याचा आरोप संघाने केला आहे. लोकप्रतिनिधींना अशा प्रकारची दमदाटीची भाषा शोभणारी नसून पत्रकार म्हणून आपले कर्तव्य बजावणाऱ्या माध्यम प्रतिनिधींचा हा अपमान असल्याचे संघाने म्हटले आहे.
मुंबई मराठी पत्रकार संघाच्या निवेदनात म्हटले आहे की, पत्रकारांशी अशा पद्धतीने वागणे म्हणजे केवळ पत्रकारांचाच नव्हे तर लोकशाहीच्या चौथ्या स्तंभाचाही अवमान आहे. लोकप्रतिनिधींनी पत्रकारांच्या प्रश्नांना संयमाने आणि जबाबदारीने उत्तरे देणे अपेक्षित असते. पत्रकारांना धमकावण्याचा किंवा त्यांची अवहेलना करण्याचा कोणालाही अधिकार नसल्याचे संघाने स्पष्ट केले आहे.
अशा प्रकारच्या वक्तव्यांमुळे प्रसारमाध्यमांच्या स्वातंत्र्याबाबत समाजात चुकीचा संदेश जात असल्याची चिंता व्यक्त करत मुंबई मराठी पत्रकार संघाने खासदार संजय दिना पाटील यांनी आपल्या वक्तव्याबद्दल तातडीने जाहीर माफी मागावी, अशी मागणी केली आहे.
