नदीच्या पुराने दोन तालुक्यांचा संपर्क दोन दिवसापासून तुटला
शिक्रापूर: आरणगाव (ता. शिरुर) येथील वडगाव बांडे ता. दौंड या गावाच्या मध्यभागी असलेल्या भीमा नदीला सध्या सुरु असलेल्या संततधार पावसामुळे पूर आलेला असल्याने येथील भीमा नदीवरील पूल पाण्याखाली गेल्याने येथील नागरिकांच्या दळणवळण चा प्रश्न निर्माण झाला आहे.
आरणगाव (ता. शिरुर) येथील भीमा नदीवर बंधारा असून सध्या सुरु असलेल्या संततधार पावसामुळे भीमा नदीला पूरस्थिती निर्माण झाली आहे. भीमा नदीला आलेल्या पुरामुळे येथील नदीवरील पूल पाण्याखाली गेला. तसेच सदर बंधाऱ्याला कठडे नसल्याने येथून वाहतूक करणे धोकादायक झाले असल्याने येथून धोकादायक पद्धतीने प्रवास करणाऱ्या वाहन चालकांवर पोलिसांच्या वतीने कारवाई करण्यात आली आहे. मात्र येथील बंधारा पाण्याखाली गेल्याने या ठिकाणच्या शिरुर व दौंड तालुक्यातील अनेक गावांचा संपर्क तुटला असून येथील दुग्धव्यावसायिक व शाळकरी मुलांसह कामगार व शेतकऱ्यांचे मोठे नुकसान झालेले असून प्रशासनाच्या वतीने सतर्कतेचा इशारा देण्यात आला आहे.
रस्ता वाहतुकीस बंद व वाहनचालकांवर कारवाई: संतोष लेंडे (पोलीस पाटील)
आरणगाव व वडगाव बांडेला जोडणारा भीमा नदीच्या बंधाऱ्यावरील पूल पाण्याखाली गेल्याने सदर रस्ता बंद ठेवण्यात आलेला असून सदर पुलावरुन धोकादायक पद्धतीने वाहतूक करणाऱ्या वाहन चालकांवर पोलीस हवालदार किशोर तेलंग व अमोल चव्हाण यांनी दंडात्मक कारवाई केली असल्याने पोलीस पाटील संतोष लेंडे यांनी सांगितले.
