शिक्रापूर (शेरखान शेख): राष्ट्रीय विधी सेवा प्राधिकरण नवी दिल्ली आणि महाराष्ट्र राज्य विधी सेवा प्राधिकरण उच्च न्यायालय मुंबई यांच्या निर्देशानुसार सर्व जिल्ह्यातील सर्व न्यायालयामध्ये प्रमुख जिल्हा व सत्र न्यायाधीश श्याम चांडक यांच्या मार्गदर्शनाखाली रविवार ३० एप्रिल २०२३ रोजी राष्ट्रीय लोक अदालत आयोजित करण्यात येणार आहे.
पुणे जिल्हयासह सर्व ठिकाणी होणाऱ्या या लोक अदालतमध्ये प्रलंबित असलेली मोटार वाहन, नुकसान भरपाई प्रकरणे, कौटुंबिक वादाची प्रकरणे, वीज वितरण कंपनीची प्रकरणे, दिवाणी प्रकरणे, फौजदारी प्रक्रिया संहितेच्या कलम ३२० अनुसार तडजोड करण्या योग्य गुन्ह्यांचा समावेश असलेली फौजदारी प्रकरणे, चेक बाऊंन्सची प्रकरणे अशी पुणे जिल्ह्यातील सर्व न्यायालया मध्ये प्रलंबित असलेली एकूण ४४ हजार ६१६ प्रकरणे ठेवण्यात आलेली असून बँक, वीज कंपनी, महानगरपालिका व ग्रामपंचायतीची घरपट्टी व पाणीपट्टीची तसेच विविध वित्तीय संस्थाची व मोटार वाहन कायद्या अंतर्गत येणारी अशी एकूण १ लाख २६ हजार ५९७ दाखलपूर्व प्रकरणे तडजोडी करीता ठेवण्यात आलेली आहेत.
नागरिकांना आपली प्रकरणे लोक न्यायालय मध्ये तडजोडी करीता ठेवावयाची असल्यास संबंधित न्यायालयामध्ये किंवा जिल्हा विधि सेवा प्राधिकरण पुणे तसेच तालुका विधि सेवा समिती येथे संपर्क साधुन आपली प्रकरणे लोक न्यायालय मध्ये ठेवावीत. तसेच लोक न्यायालया मध्ये प्रकरणे ठेवण्यासाठी पक्षकार त्यांच्या वकिलांशी संपर्क करु शकतात तसेच त्यांची मदत देखील घेवू शकतात. लोक न्यायालयामध्ये प्रकरणे मिटल्यास कोर्ट फी नियमाप्रमाणे परत मिळू शकते आणि प्रकरणाचा झटपट निकाल लागतो.
लोक न्यायालयच्या निकालावर अपील नाही. परस्पर संमतीने निकाल झाल्याने आपापसात कटुता निर्माण होत नाही. वेळ व पैसा दोघांचीही बचत होते. जास्तीत जास्त पक्षकारांनी या योजनेचा लाभ घ्यावा असे आवाहन जिल्हा विधी सेवा प्राधिकरणाच्या सचिव मंगल कश्यप यांनी केले आहे.
