शिक्रापूर: शिरुर तालुक्यात पोलीस स्टेशन मध्ये वेगवेगळ्या घटना घडत असताना मागील आठवड्यात शिरुर पोलीस स्टेशन मधून एका आरोपीने पलायन केलेले असताना आता शिक्रापूर पोलीस स्टेशन मध्ये एका मनोरुग्ण युवकाने हाय व्होल्टेज ड्रामा केल्याने खळबळ उडाली आहे.
शिक्रापूर (ता. शिरुर) पोलीस स्टेशन मधील पोलीस अधिकारी, कर्मचारी त्यांचे कर्त्यव्य बजावत असताना दुपारच्या सुमारास सणसवाडी येथील एका कंपनीतील युवकाने एका मनोरुग्ण युवकाला संशयित म्हणून पकडून आणले. दरम्यान पोलिसांनी त्या युवकाकडे चौकशी केली असता तो दारुच्या नशेत तसेच मनोरुग्ण असल्याचे समोर आले.
यावेळी पोलिसांनी त्याला शांत करण्यासाठी काही वेळ सावलीमध्ये बसवले. मात्र अचानकपणे सदर युवक बडबड करत येथील झाडावर चढला. यावेळी पोलीस देखील गोंधळून गेले काही पोलिसांनी त्याला खाली उतरविण्याचा प्रयत्न केले. काही वेळाने सदर युवक झाडावरुन खाली उतरल्याने अनर्थ टळला तर पोलिसांनी याबाबत पोलीस स्टेशन येथे नोंद करत त्याला घरी पाठवले. मात्र याबाबत बोलताना सदर युवक वेडसर असल्याने त्याच्यावर कोणत्याही स्वरुपाचा गुन्हा दाखल केला नसल्याचे सहाय्यक पोलीस निरीक्षक नितीन अतकरे यांनी सांगितले.