आळंदी (प्रतिनिधी) भाजपचे प्रदेशाध्यक्ष चंद्रशेखर बावनकुळे यांनी रविवार (दि 24) एका कार्यक्रमात पत्रकारांना चहा पाजा, ढाब्यावर जेवायला न्या असा भाजपच्या पदाधिकारी, कार्यकर्ते यांना संवाद बैठकीत सल्ला दिला. त्यांच्या या वक्तव्याचा हुतात्मा राजगुरू पत्रकार संघ यांच्या वतीने जाहीर निषेध करण्यात आला. तसेच राजगुरुनगर (खेड) तहसीलदार यांना निवेदन देण्यात आले. तहसीलदार प्रशांत बेडसे यांचे वतीने अप्पर तहसीलदार स्नेहा सिंदे व महसूल नायब तहसीलदार आर बि बिजे यांनी हुतात्मा राजगुरु पत्रकार संघ खेड अध्यक्ष अर्जुन मेदनकर यांचे हस्ते निवेदन स्वीकारले.
यावेळी संघाचे उपाध्यक्ष एम डी पाखरे, खजिनदार सुनील बटवाल, सदस्य अनिल जोगदंड, बद्रीनारायण घुगे, खेड तहसीलदार कार्यालयातील शैलेश कुऱ्हाडे आदी उपस्थित होते. यावेळी देण्यात असलेल्या निवेदनात भाजप प्रदेशाध्यक्ष चंद्रशेखर बावनकुळे यांनी केलेल्या बेताल वक्तव्याचा जाहीर निषेध करुन त्यांनी या प्रकरणी माफी मागावी अशी मागणी करण्यात आली असल्याचे हुतात्मा राजगुरू पत्रकार संघाचे अध्यक्ष अर्जुन मेदनकर यांनी सांगितले.
