शिक्रापूर (शेरखान शेख): विठ्ठलवाडी (ता. शिरुर) येथील एका शेतकऱ्याला उसतोड कामासाठी कामगार पुरवितो असे म्हणून शेतकऱ्याची तब्बल सहा लाख अठ्ठेचाळीस हजार रुपयांची फसवणूक केल्याची घटना घडली आहे. शिक्रापूर पोलिस स्टेशन येथे सोमनाथ शेम्पू सोनवणे याच्यावर गुन्हे दाखल करण्यात आले आहेत.
विठ्ठलवाडी (ता. शिरुर) येथील विश्वनाथ गवारे यांचा शेतीसह उसाचा व्यापार आहे. गवारे यांना नेहमी उसतोडणी साठी कामगार लागत असल्याने ते विविध ठिकाणहून कामगार आणत असतात. गवारे यांची व्यवसायातून सोमनाथ सोनवणे याच्या सोबत ओळख झालेली होती. सोनवणे याने गवारे यांना उसतोड कामगार आणून देतो त्यांना देण्यासाठी उचल द्यावी लागेल, असे म्हणून तब्बल सहा लाख अठ्ठेचाळीस हजार रुपये घेतले. त्यांनतर आज कामगार येतील, उद्या कामगार येतील असे म्हणत कामगार पुरविण्यास टाळाटाळ केली.
सोनवणे याने कामगार पुरविले नाही तसेच गवारे यांचे पैसे देण्यात देखील टाळाटाळ करु लागला. त्यामुळे आपली फसवणूक झाल्याचे लक्षात आल्याने विश्वनाथ कोंडीबा गवारे (वय ६० वर्षे रा. विठ्ठलवाडी ता. शिरुर जि. पुणे) यांनी शिक्रापूर पोलिस स्टेशन येथे फिर्याद दिली आहे. शिक्रापूर पोलिसांनी सोमनाथ शेम्पू सोनवणे (रा. कौळाणे ता. मालेगाव जि. नाशिक) याच्या विरुद्ध फसवणूक प्रकरणी गुन्हे दाखल केले आहेत. सदर गुन्ह्याचा पुढील तपास पोलिस निरीक्षक हेमंत शेडगे यांच्या मार्गदर्शनाखाली पोलिस हवालदार किशोर तेलंग हे करत आहेत.
