शिक्रापूर: सणसवाडी (ता. शिरुर) येथील एका पान टपरीतून चक्क १ लाख ७० हजार रुपयांचा गायछाप, सिगारेट सह आदी प्रकारचा माल चोरीला गेल्याची घटना घडली असल्याने शिक्रापूर पोलीस स्टेशन येथे अज्ञात चोरट्यावर गुन्हे दाखल करण्यात आले आहे.
सणसवाडी (ता. शिरुर) येथे बलेंदर यादव यांची ओंकार पान शॉप नावाने पानटपरी असून (दि. २३) जुलै रोजी रात्रीच्या सुमारास यादव त्यांची पानटपरी बंद करुन घरी गेले होते. दुसऱ्या दिवशी सकाळच्या सुमारास यादव हे त्यांची पान टपरी उघडण्यासाठी आले असता त्यांना टपरीचे कुलूप तुटले असल्याचे दिसून आले. त्यामुळे त्यांनी आतमध्ये जात पाहणी केली असता अज्ञात व्यक्तीने टपरीचे कुलूप तोडून आतमध्ये प्रवेश करुन टपरीरील गायछाप तंबाकू, सिगारेट यांसह आदी साहित्य असा सुमारे १ लाख ७० हजार रुपयांचा ऐवज चोरुन नेला असल्याचे निदर्शनास आले.
याबाबत बलेंदर राजकिशोर यादव (वय ३२) रा. सणसवाडी (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात चोरट्यावर गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस नाईक रविकिरण जाधव हे करत आहे.
