जिल्हाधिकाऱ्यां नंतर विभागीय आयुक्तांनी दोघांना ठरवले अपात्र
शिक्रापूर (शेरखान शेख): खैरेवाडी (ता. शिरुर) येथील ग्रामपंचायतचे उपसरपंच नंदकिशोर गोडसे व ग्रामपंचायत सदस्य मुरलीधर मांदळे या दोघांना यापूर्वी जिल्हाधिकारी यांनी अपात्र ठरवलेले असताना त्यांनी नुकतेच विभागीय आयुक्तांकडे अपील केले असता विभागीय आयुक्तांनी जिल्हाधिकाऱ्यांचा निर्णय कायम ठेवत दोघांना देखील अपात्र ठरवले असल्याने शिरुर तालुक्यात खळबळ उडाली आहे.
खैरेवाडी (ता. शिरुर) ग्रामपंचायतचे उपसरपंच नंदकिशोर काळूराम गोडसे व ग्रामपंचायत सदस्य मुरलीधर प्रभू मांदळे या दोघांनी शासकीय जागेमध्ये अतिक्रमण केले असून त्याबाबतची माहिती देखील निवडणूक निर्णय अधिकारी यांच्याकडे सादर करताना खोट्या पद्धतीने सादर केल्याबाबतची तक्रार सामाजिक कार्यकर्ते वैभव देशमुख यांनी जिल्हाधिकारी यांच्याकडे केली होती. त्यानंतर जिल्हाधिकारी डॉ. राजेश देशमुख यांनी उपसरपंच नंदकिशोर काळूराम गोडसे व ग्रामपंचायत सदस्य मुरलीधर प्रभू मांदळे यांनी दोघांची पदे अपात्र ठरवले होते.
त्यानंतर दोघांनी देखील विभागीय आयुक्तांकडे अपील केले असता विभागीय आयुक्तांनी देखील त्यावर निकाल देत जिल्हाधिकाऱ्यांचा आदेश कायम ठेवत उपसरपंच नंदकिशोर काळूराम गोडसे व ग्रामपंचायत सदस्य मुरलीधर प्रभू मांदळे या दोघांचे देखील पद अपात्र ठरवले आहे, तर विभागीय आयुक्तांच्या आदेशामुळे दोघांना चांगलाच दणका बसला असून शिरुर तालुक्यात चांगलीच खळबळ उडाली आहे.
