भीमाशंकर: बारा ज्योतिर्लिंगांपैकी एक असलेले प्रसिद्ध भीमाशंकर ज्योतिर्लिंग मंदिर महाशिवरात्रीच्या दिवशी भाविकांसाठी बंद ठेवण्यात येणार आहे. पुणे जिल्हाधिकाऱ्यांच्या निर्देशानुसार हा निर्णय घेण्यात आला असून, सध्या मंदिर परिसरात डागडुजी व दुरुस्तीचे काम सुरू असल्याने सुरक्षिततेच्या कारणास्तव हे पाऊल उचलण्यात आल्याची माहिती मंदिर प्रशासनाने दिली आहे.
दरवर्षी महाशिवरात्रीच्या निमित्ताने भीमाशंकर येथे राज्यासह देशभरातून लाखो भाविक दर्शनासाठी गर्दी करतात. मात्र, यावर्षी सुरू असलेल्या दुरुस्ती कामांमुळे तसेच भाविकांच्या सुरक्षिततेचा विचार करता, महाशिवरात्रीच्या दिवशी प्रत्यक्ष दर्शनासाठी मंदिर बंद ठेवण्याचा निर्णय घेण्यात आला आहे.
या निर्णयाच्या पार्श्वभूमीवर भाविकांनी महाशिवरात्रीच्या दिवशी भीमाशंकर येथे येणे टाळावे, असे आवाहन मंदिर प्रशासनाकडून करण्यात आले आहे. प्रशासनाने भाविकांच्या सहकार्याची अपेक्षा व्यक्त केली असून, दुरुस्तीचे काम पूर्ण झाल्यानंतर नियमित दर्शन पुन्हा सुरू केले जाईल, असेही स्पष्ट करण्यात आले आहे.
दरम्यान, या निर्णयामुळे अनेक भाविकांमध्ये नाराजी व्यक्त होत असली तरी, मंदिराच्या दीर्घकालीन सुरक्षिततेसाठी हा निर्णय आवश्यक असल्याचे प्रशासनाकडून सांगण्यात आले आहे.
