शिक्रापूर (शेरखान शेख): शिक्रापूर (ता. शिरुर) येथील पोलीस स्टेशन मध्ये सध्या उन्हाळ्यातून होणाऱ्या उकाड्यापासून सुरक्षितता मिळवण्यासाठी पोलीस स्टेशन हद्दीतील पोलीस पाटलांकडून कुलर भेट देण्यात आल्याने शिक्रापूरच्या पोलिसांना पोलिस पाटलांकडून गारवा मिळाला आहे.
शिक्रापूर (ता. शिरुर) येथील पोलीस स्टेशन मध्ये आज पोलीस पाटील यांची मिटिंग आयोजित करण्यात आलेली असताना काही पोलीस कर्मचारी काम करत असलेल्या ठिकाणी उन्हाचा कडाका जास्त असल्याने पोलीस कर्मचाऱ्यांना उकाड्यात काम करण्याची वेळ येत असल्याचे निदर्शनास आल्याने पोलीस स्टेशन हद्दीतील पोलीस पाटील यांच्याकडून पोलीस स्टेशनला कुलर भेट देण्यात आला.
यावेळी पोलीस निरीक्षक प्रमोद क्षिरसागर, पोलीस हवालदार संदीप कारंडे, शिरुर तालुका पोलीस पाटील संघाचे अध्यक्ष प्रकाश करपे, पोलीस पाटील जयसिंग भंडारे, कृष्णा गजरे, लक्ष्मण खैरे, आत्माराम डफळ, जालिंदर पवार, मंगेश चव्हाण, पांडुरंग दरेकर यांसह आदी उपस्थित होते.
दरम्यान यावेळी बोलताना पोलीस पाटील यांच्याकडून पोलीस कर्मचाऱ्यांच्या सुरक्षिततेसाठी राबवलेला सदर उपक्रम कौतुकास्पद असल्याचे पोलीस निरीक्षक प्रमोद क्षिरसागर यांनी सांगितले, दरम्यान पोलीस हवालदार संदीप कारंडे यांनी सर्वांचे आभार मानले.
