शालेय व्यवस्थापन समितीकडूनच पंचायत समितीकडे तक्रार
शिक्रापूर (शेरखान शेख): शिक्रापूर (ता. शिरुर) येथील जिल्हा परिषद प्राथमिक शाळा कोयाळी पुनर्वसन या शाळेने जिल्हा परिषदेचा अध्यक्ष चषक मिळवलेला तसेच आमदार अशोक पवार यांनी विधानसभेत सदर शाळेचा उल्लेख केलेली शाळा असून या शाळेमध्ये इयत्ता पहिलीतील तीनशे हून अधिक तर इतर वर्गातील पन्नास विद्यार्थ्यांच्या पालकांकडून तीन ते पाच हजार रुपये प्रवेश फी म्हणून घेत मुख्याध्यापकांवर दहशत करणाऱ्या शाळेच्या शाळा व्यवस्थापन समितीच्या तीन सदस्यांवर कारवाई करण्यासाठी शालेय व्यवस्थापन समितीच्या तेरा सदस्यांनी शिरुर पंचायत समितीकडे तक्रार केली असून कारवाई करत गुन्हे दाखल न केल्यास आंदोलनाचा इशारा दिला आहे.
शिक्रापूर (ता. शिरुर) येथील जिल्हा परिषद प्राथमिक शाळा कोयाळी पुनर्वसन शाळेतील शाळा व्यवस्थापन समितीचे अध्यक्ष अविनाश करंजे व सदस्य रवींद्र पाटील व अतुल ताजणे यांनी गेल्या काही दिवसांपासून शाळेवर आपला कब्जा मिळवून मुख्याध्यापकांवर दहशत सुरू करत मुख्याध्यापकांचा पदभार सोयिस्कर एका शिक्षकाकडे द्यायला लावून, शाळा व्यवस्थापन समितीच्या मंजुरीशिवाय जमा रकमेची विल्हेवाट लावण्याचा गंभीर प्रकार काही वर्षांपासून शाळेत होत असून या घोटाळ्यात सहभागी होण्यासाठी देखील एका मुख्याधापकांवर दहशत केली जात असल्याचे केलेल्या तक्रारीत म्हटले आहे. सदर शाळेत प्रवेशासाठी सक्तीने तीन ते पाच हजारांच्या देणग्या गोळा करुन त्याचा हिशोब शाळा व्यवस्थापन समितीला दिला जात नसल्याने तेरा सदस्यांनी सदर प्रकरण बाहेर काढले आहे.
सदर घोटाळ्यात अध्यक्ष व दोन सदस्यांचा हा घोटाळा असून तिघांमुळे शाळा तर बदनाम होत असताना आठ ते दहा लाखांची अफरातफर करुन २८४ विद्यार्थ्यांना शाळा गणवेश न वाटता त्याचे पैसे गणवेश पूरवठादाराला परस्पर दिल्याचीही तक्रार शालेय व्यवस्थापन समितीच्या तेरा सदस्यांनी केल्याची माहिती शाळा व्यवस्थापन समितीचे सदस्य तथा ग्रामपंचायत सदस्य त्रिनयन कळमकर यांनी दिली आहे. तर याबाबत बोलताना शाळेबाबत आम्ही तक्रार केल्याने चौकशी समिती नेमली गेली, काही पालकांनी स्वच्छेने शाळेला देणगी दिली, ती रक्कम शाळेच्या बँक खात्यात भरुन देणी चेकद्वारे दिली, या निर्णयामध्ये तक्रार दार सदस्य सहभागी असून तक्रार दारांच्या खांद्यावर बंदूक ठेवून शाळेत राजकीय कुरखोडी सुरु असल्याचे व्यवस्थापन समितीचे अध्यक्ष अविनाश करंजे यांनी सांगितले.
शिक्रापूर (ता. शिरुर) येथील जिल्हा परिषद प्राथमिक शाळा कोयाळी पुनर्वसन शाळेतील आर्थिक अफरातफरी बाबत तक्रार आली असून त्यावर विस्ताराधिकारी, कार्यालयीन अधिकारी व कर्मचाऱ्यांनाकडून अर्जाची छाननी तसेच माहिती संकलन सुरु केली असून तक्रार दारांच्या अर्जातील माहिती नुसार पुढील कार्यवाही व चौकशी होईल असे शिरुर पंचायत समितीचे गटशिक्षणाधिकारी अनिल बाबर यांनी सांगितले.
शिक्रापूर (ता. शिरुर) येथील जिल्हा परिषद प्राथमिक शाळा कोयाळी पुनर्वसन शाळेतील घटनेबाबत जिल्हा परिषदेकडून नेमलेल्या चौकशी समितीकडून चौकशी सुरू असल्याने याबाबत मला अधिक बोलता येणार नसल्याची प्रतिक्रिया शाळेचे मुख्याध्यापक अशोक बगाटे यांनी दिली.
