खाजगी व्यक्तींच्या हस्तक्षेपामुळे महसूल प्रशासनाच्या पारदर्शकतेवर प्रश्नचिन्ह…?
शिरूर (तेजस फडके): शासकीय कार्यालय म्हणजे जनतेच्या कामासाठी उभारलेली व्यवस्था. येथे प्रत्येक टेबल, प्रत्येक खुर्ची आणि प्रत्येक फाईलला शासनाची जबाबदारी जोडलेली असते. मात्र, शिरुर तहसील कार्यालयातील गौण खनिज विभागाच्या कामकाजाबाबत समोर येणाऱ्या तक्रारींमुळे ‘या विभागाचा कारभार नेमका अधिकारी-कर्मचाऱ्यांच्या हातात आहे की खाजगी एजंटांच्या…?’ असा थेट सवाल उपस्थित झाला आहे.
View this post on Instagram
गौण खनिज विभाग हा महसूल प्रशासनातील अत्यंत महत्त्वाचा आणि संवेदनशील विभाग आहे. मुरुम, वाळू, दगड, खडी, माती यांसह विविध गौण खनिजांचे उत्खनन, वाहतूक, परवाने, रॉयल्टी, दंडात्मक कारवाई आणि अनधिकृत उत्खननावर नियंत्रण ठेवण्याची जबाबदारी या विभागावर आहे. अशा विभागात नियम, नोंदी आणि अधिकृत यंत्रणा यांना सर्वोच्च प्राधान्य असणे अपेक्षित आहे. मात्र, या विभागातील कामकाजाबाबत खाजगी व्यक्ती अथवा एजंटांचा हस्तक्षेप होत असल्याच्या तक्रारी काही सजग नागरिकांकडून पुढे येत असुन प्रशासनाने त्याकडे गांभीर्याने पाहण्याची गरज आहे.
सरकारी टेबलवर ‘खासगी’ कारभार…?
सर्वात महत्त्वाचा प्रश्न म्हणजे शासकीय कार्यालयातील अधिकृत खुर्चीवर बसून काम करण्याचा अधिकार नेमका कोणाला आहे…? एखाद्या खाजगी व्यक्तीला शासकीय पद नसताना कार्यालयीन कामकाजाशी संबंधित कागदपत्रे तसेच संगणक हाताळण्याची परवानगी आहे का…? बाहेरील व्यक्ती किंवा एजंट कार्यालयीन कामकाजात इतका हस्तक्षेप कसा काय करु शकतो. गौण खनिज विभागातील कर्मचाऱ्याच्या टेबलवर बसुन जर तो कामकाज पाहत असेल तर तिथं सरकारी बाबु नक्की कुणासाठी काम करतात. सर्वसामान्य जनतेसाठी की एजंटांसाठी हा प्रश्न उपस्थित होत असुन हा प्रश्न केवळ एका व्यक्तीपुरता मर्यादित नसून संपूर्ण महसूल प्रशासनाच्या कार्यपद्धतीवर संशयाची सुई निर्माण करणारा आहे.
View this post on Instagram
गौण खनिज विभाग नक्की कोणासाठी काम करतय सर्वसामान्य जनतेसाठी की खाजगी एजंटांसाठी…?
या प्रकरणाची सत्यता पडताळण्यासाठी कार्यालयातील सीसीटीव्ही फुटेज, अधिकारी-कर्मचाऱ्यांची उपस्थिती, गौण खनिज विभागातील फाईली, अर्जांची नोंद, परवान्यांची प्रक्रिया आणि संबंधित अधिकृत आदेश यांची तपासणी केल्यास वस्तुस्थिती स्पष्ट होऊ शकते. खाजगी व्यक्ती कार्यालयीन कामकाजात सहभागी असल्याचे आढळल्यास त्याला कोणत्या अधिकाराने प्रवेश किंवा जबाबदारी देण्यात आली, याची चौकशी होणे आवश्यक आहे. आणि गौण खनिज विभागाची खुर्ची अधिकृत कर्मचाऱ्यांसाठी आहे की खाजगी एजंटांसाठी…? यावर तहसील कार्यालयातील गौण खनिज विभागाबाबत उपस्थित झालेल्या प्रश्नांची उत्तरे आता प्रशासनाने द्यायला हवीत.
जिल्हाधिकारी लक्ष देणार का…?
शिरुर तहसील कार्यालयात संध्याकाळी सहा वाजल्यानंतर गौण खनिज विभागात खाजगी एजंट खुर्चीवर बसुन संगणकावर काम करत असल्याचा व्हिडीओ व्हायरल झाला असून या गंभीर प्रकाराची जिल्हाधिकारी, प्रांताधिकारी आणि संबंधित वरिष्ठ महसूल अधिकारी दखल घेऊन स्वतंत्र चौकशी करणार का…? याकडे नागरिकांचे लक्ष लागले आहे. शिरुर तहसिलदार कार्यालयात जर खाजगी एजंट सरकारी कर्मचाऱ्याच्या जागेवर बसुन संगणकावर कामकाज करत असेल तर त्या संबंधित कर्मचाऱ्यावर वरिष्ठ अधिकारी कारवाई करणार का…? याकडे सर्वांचे लक्ष लागले आहे. कारण हा प्रश्न एका खुर्चीचा नाही; प्रश्न आहे तो शासकीय यंत्रणेवरील जनतेच्या विश्वासाचा.
(क्रमश:)
शिरुर तालुक्यातील एका शासकीय पाझर तलावाला लागली भुक…हजारो ब्रास गौण खनिज केले गिळंकृत…
शिरुर महसुल विभागाची गौण खनिज उपसा करणाऱ्या ४ पोकलेन व १४ ट्रकवर कारवाई
वाळू तस्करांना दंड नाही तर थेट ‘एफआयआर’; महसूल विभागाचे नवे परिपत्रक
शिरूर तालुक्यात मंडल अधिकाऱ्याचा अजब कारभार; सुनावणीच्या तारखेच्या आधीच निकाल…
