शिरूर (तेजस फडके) : पुण्यातील चऱ्होली भागात १३ मे रोजी घडलेल्या गोळीबार प्रकरणातील फरार आरोपींचा शोध घेत असताना शिरूर तालुक्यातील रांजणगाव गणपती परिसरात शुक्रवारी सायंकाळी पोलिस आणि संशयित आरोपींमध्ये थरारक पाठलाग व कथित गोळीबाराची घटना घडली. यामुळे संपूर्ण परिसरात मोठी खळबळ उडाली. अष्टविनायक रोड, पिंपरी दुमाला, वाघाळे आणि सोनेसांगवी परिसरात मध्यरात्रीपर्यंत पोलिसांनी मोठ्या प्रमाणावर सर्च ऑपरेशन राबवले।
पुणे शहराजवळील चऱ्होली येथे राहणारे करण गुरुनाथ राठोड (वय २३) यांनी शेखर संभाजी जाधव (वय २५, शिक्रापूर) याला ‘चोऱ्या करू नको, सुधार’ असा सल्ला दिला होता. याच कारणावरून दोघांमध्ये काही दिवसांपूर्वी वाद व मारहाण झाली होती. त्याचा राग मनात धरून शेखर जाधव याने आपल्या तीन साथीदारांना बोलावून घेत करण राठोड व त्यांच्या मित्राला बेदम मारहाण केली. त्यानंतर शेखरने जवळील पिस्तुलातून करण यांच्या दिशेने गोळीबार करत परिसरात दहशत निर्माण केली आणि साथीदारांसह फरार झाला होता. या घटनेप्रकरणी दिघी पोलिस ठाण्यात शेखर संभाजी जाधव व त्याच्या तीन साथीदारांविरोधात गंभीर कलमान्वये गुन्हा दाखल करण्यात आला असून पुणे व पिंपरी-चिंचवड पोलिसांची विशेष पथके त्यांच्या शोधासाठी रवाना झाली होती.
View this post on Instagram
शिरूर तालुक्यातील सोनेसांगवी परिसरातील शेळके वस्ती भागात आरोपी लपून बसल्याची माहिती पोलिसांना शुक्रवारी सायंकाळी मिळाली. त्यानुसार पोलिसांनी परिसरात सापळा रचला. मात्र, पोलिसांची चाहूल लागताच आरोपींनी दुचाकीवरून पळ काढण्याचा प्रयत्न केला. यानंतर अष्टविनायक रोडवरील गणपती चौक परिसरात पोलिस आणि आरोपींमध्ये काही काळ थरारक पाठलाग सुरू झाला. आरोपींची दुचाकी अचानक बंद पडल्याने किंवा नियंत्रण सुटल्याने त्यांनी वाहन रस्त्यातच टाकून दिले. त्यानंतर अंधार आणि परिसरातील दाट उसाच्या शेतांचा फायदा घेत आरोपींनी पिंपरी दुमाला-वाघाळे परिसराच्या दिशेने धाव घेत पलायन केले.
स्थानिक नागरिकांच्या माहितीनुसार, आरोपींकडून पोलिसांच्या दिशेने हवेत गोळीबार करण्यात आल्याची चर्चा होती. त्यानंतर पोलिसांनीही स्वसंरक्षणासाठी हवेत काही राऊंड फायर केल्याचे सांगितले जात आहे. मात्र, या संपूर्ण घटनेबाबत अधिकृत दुजोरा अद्याप पोलिस प्रशासनाकडून देण्यात आलेला नाही.
घटनेची माहिती मिळताच रांजणगाव एमआयडीसी पोलिस, पुणे ग्रामीण पोलिस, स्थानिक गुन्हे शाखा तसेच पिंपरी-चिंचवड पोलिसांची अतिरिक्त पथके घटनास्थळी दाखल झाली. संपूर्ण परिसरात नाकाबंदी करण्यात आली होती. उसाच्या शेतांमध्ये, वस्तीभागात तसेच गावालगतच्या रस्त्यांवर पोलिसांनी मोठ्या प्रमाणावर शोधमोहीम राबवली. रात्री उशिरापर्यंत आरोपींचा शोध सुरू असल्याची माहिती समोर आली.
दरम्यान, मुख्य संशयित शेखर संभाजी जाधव याच्यावर यापूर्वीही गंभीर गुन्हे दाखल असल्याची चर्चा परिसरात सुरू आहे. या संपूर्ण घटनेमुळे सोनेसांगवी, पिंपरी दुमाला आणि वाघाळे परिसरात भीतीचे वातावरण निर्माण झाले होते. मध्यरात्रीपर्यंत पोलिसांच्या वाहनांची धावपळ, नाकाबंदी आणि सर्च ऑपरेशनमुळे नागरिकांमध्ये एकच चर्चा रंगली होती.
शिरूर तालुक्यातील महिलेला चोराचा चेहरा पाहून बसला धक्का; लाखोंचे दागिने हस्तगत…
Video! शिरूर तालुक्यातील सविंदणे गावात हवेत गोळीबार; गुन्हा दाखल…
शिरूर पोलिसांनी गोळीबार प्रकरणातील आरोपीला काही तासांतच परजिल्ह्यातून केले जेरबंद…
