मुंबई: नाशिकच्या आमदार सरोज अहिरे यांनी काल डॉ. नीलम गोऱ्हे यांच्याशी संपर्क साधून हिरकणी कक्ष व्यवस्थित नसल्याबद्दल माहिती दिली. यावर तात्काळ विधान सभा अध्यक्ष राहुल नार्वेकर यांच्याशी संपर्क साधून याबाबत योग्य कार्यवाही करण्यासाठी डॉ. गोऱ्हे यांनी सूचित केले. यावर राज्य सरकारने तातडीने कार्यवाही करत पहिल्या मजल्यावर या अद्ययावत कक्षाची उभारणी केली.
आज त्याची पाहणी या सर्व मान्यवरांनी केली. यावेळी बोलताना, विधिमंडळात पूर्वी असलेले नियम नियम समितीच्या माध्यमातून बदलून प्रसूतीसाठी महिला आमदारांनाही तीन महिन्यांची रजा मिळण्यासाठी पुढाकार घेतल्याची माहिती डॉ. गोऱ्हे यांनी दिली. आ. सरोज अहिरे यांनी नीलम ताई आणि राज्य सरकारच्या सर्व अधिकाऱ्यांचे आभार मानले. अशी सुविधा राज्यात सर्वत्र व्हावी अशी अपेक्षा व्यक्त केली.
