शिक्रापूर (शेरखान शेख): शिक्रापूर (ता. शिरुर) येथील चाकण चौक परिसरात वेश्याव्यवसाय करणाऱ्या महिलांवर शिक्रापूर पोलिसांच्या पथकाने छापा टाकत कारवाई करुन 2 महिलांवर गुन्हे दाखल केले असल्याची माहिती शिक्रापूर पोलिसांनी दिली आहे.
शिक्रापूर (ता. शिरुर) येथील चाकण चौक परिसरात काही महिला वेश्याव्यवसाय करत असल्याची माहिती पोलीस निरीक्षक प्रमोद क्षिरसागर यांना मिळाली. त्यानंतर सहाय्यक पोलीस उपनिरीक्षक जितेंद्र पानसरे, पोलीस हवालदार श्रीमंत होनमाने, अमोल दांडगे, महिला पोलीस नाईक किरण निकम, अपेक्षा टाव्हरे, पोलीस नाईक विकास पाटील, यांनी सदर ठिकाणी जाऊन पाहणी केली असता दोन महिला शरीराचे प्रदर्शन करुन नागरिकांना अश्लील हावभाव करुन वेश्याव्यवसाय करण्यास प्रवृत्त करत असल्याचे दिसून आले. यावेळी पोलिसांच्या पथकाने दोन्ही महिलांना ताब्यात घेत कारवाई केली.
याबाबत शिक्रापूर पोलीस स्टेशनच्या महिला पोलीस नाईक अपेक्षा बाजीराव टाव्हरे (वय २७) व किरण नाना निकम (वय ३२) रा. शिक्रापूर (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिल्याने शिक्रापूर पोलिसांनी 2 महिलांवर गुन्हे दाखल केले असून पुढील तपास पोलीस निरीक्षक प्रमोद क्षिरसागर यांच्या मार्गदर्शनाखाली पोलीस हवालदार प्रशांत गायकवाड व बापू हडागळे हे करत आहे.
