शिरूर (अरुणकुमार मोटे): शिरूर तालुक्यातील न्हावरे येथे भरधाव कंटेनर ट्रकच्या भीषण अपघातात तिघांचा मृत्यू झाला असून, एक महिला गंभीर जखमी झाली आहे. हा अपघात 23 मार्च 2025 रोजी रात्री 7.30 वाजता तळेगाव ढमढेरे-न्हावरे रस्त्यावर संदीप महादेव सरके यांच्या घरासमोर घडला.
अपघाताची सविस्तर हकीकत, मृत कैलास कृष्णाजी गायकवाड (49) हे त्यांच्या ताब्यातील पांढऱ्या रंगाच्या स्विफ्ट कार (MH-16 CV-4176) मधून त्यांच्या कुटुंबीयांसह वाघोली (पुणे) येथून न्हावरेकडे येत होते. कारमध्ये त्यांची पत्नी दुर्गा कैलास गायकवाड (45), मुलगी गौरी कैलास गायकवाड (20) आणि चुलत मेहुणा गणेश महादेव नेर्लेकर (23, रा. कोकणगाव, श्रीगोंदा) हे प्रवास करत होते.
न्हावरे गावच्या हद्दीत आल्यानंतर समोरून भरधाव वेगाने आलेल्या कंटेनर ट्रक (NL-05 G-2396) ने त्यांच्या कारला जोरदार धडक दिली. या अपघातात कैलास गायकवाड, त्यांची मुलगी गौरी गायकवाड आणि गणेश नेर्लेकर यांचा जागीच मृत्यू झाला. तर दुर्गा गायकवाड या गंभीर जखमी झाल्या असून त्यांच्यावर स्थानिक रुग्णालयात उपचार सुरू आहेत.
अपघातानंतर कंटेनर ट्रक चालक घटनास्थळावरून फरार झाला. घटनेची माहिती मिळताच शिरूर पोलीस घटनास्थळी दाखल झाले आणि अपघाताची नोंद घेतली.
या प्रकरणी रविंद्र महादेव सोनवणे (वय 38, व्यवसाय शेती, रा. कुटेवस्ती, न्हावरे) यांनी शिरूर पोलीस ठाण्यात फिर्याद दिली आहे. कंटेनर ट्रक चालकाविरोधात गुन्हा दाखल करण्यात आला आहे. या प्रकरणाचा पुढील तपास पोलीस हवालदार भोते हे करत आहे.
