अॅड. राजेंद्र उमापांकडून पुणे बार असोसिएशनकडे रुग्णवाहिका सुपूर्द
शिक्रापूर (शेरखान शेख): पुणे जिल्ह्यात संख्येने १५ हजारांपेक्षा जास्त असलेल्या पुणे न्यायालयातील सर्व वकीलांसाठी आणि सुमारे ५०० न्यायालयीन अधिकारी कर्मचाऱ्यांसाठी पुणे बार असोसिएशनचे माजी अध्यक्ष तथा महाराष्ट्र गोवा बार असोसिएशनचे उपाध्यक्ष अॅड. राजेंद्र उमाप यांच्याकडून नुकतीच सुसज्ज रुग्णवाहिका देण्यात आली असून न्यायालयात वैद्यकीय आपत्कालीन सुविधा नसलेल्या पुण्यातील वकीलांसाठी सदर रुग्णवाहिका नुकतीच अॅड राजेंद्र .उमाप यांचे वडील बाबुराव उमाप यांचे हस्ते पुणे बार असोसिएशनकडे सुपूर्द करण्यात आली आहे.
पुणे येथे महाराष्ट्र व गोवा वकील परिषद तसेच पुणे बार असोसिएशन यांच्या संयुक्त विद्यमानाने एक दिवसाची पश्चिम महाराष्ट्रातील प्रादेशिक वकील परिषद व कार्यशाळा नुकतीच संपन्न झाली. सर्वोच्च न्यायालयाचे न्यायमूर्ती भूषण गवई, मुंबई उच्च न्यायालयाचे वरिष्ठ न्यायमूर्ती प्रसन्न वराळे व ग्राहक आयोगाचे अध्यक्ष न्यायमूर्ती सुरेंद्र तावडे यांच्या उपस्थितीत संपन्न झालेल्या या कार्यशाळेत महाराष्ट्र वकील परिषदेचे राष्ट्रीय सदस्य अॅड .जयंत जायभावे यांनी मिळकतीचे काम करताना वकील वर्गाकडून असलेल्या अपेक्षा व्यक्त केल्या.
यावेळी दस्त नोंदणी क्षेत्रातील 35 वर्षाहून अधिक सेवा केलेल्या 11ज्येष्ठ वकिलांचा सन्मान अॅड. हर्षद निंबाळकर, अॅड. ए.व्ही.पठाण, पुणे बार असोसिएशनचे माजी अध्यक्ष अॅड. राजेंद्र उमाप व पुणे वकील संघाचे अध्यक्ष अॅड. व्ही. बी. थोरवे यांच्या हस्ते करण्यात आला. दरम्यान अॅड राजेंद्र उमाप यांच्या वतीने देण्यात आलेल्या अॅंब्यूलन्सचे लोकार्पन त्यांचे वडील बाबुराव उमाप व शिरुर पंचायत समितीचे माजी सभापती सुभाष उमाप यांचे हस्ते करण्यात आले.
यावेळी कार्यशाळेच्या पहिल्या सत्रात अॅड. जयंत जायभावे, अॅड. सुधाकर आव्हाड, अॅड. नरेश गुगळे, अॅड. सखाराम कोळसे पाटील यांनी तर दुसऱ्या सत्रात ज्येष्ठ विधीज्ञ श्रीकांत कानेटकर, अॅड. हर्षद निंबाळकर यांनी तसेच तिसऱ्या सत्रात पुणे जिल्हा न्यायालयाचे प्रधान जिल्हा व सत्र न्यायाधीश संजय देशमुख यांनी उपस्थितांना मार्गदर्शन केले. सदर कार्यशाळेचे सूत्रसंचालन करत आभार अॅड. लक्ष्मण येळे पाटील यांनी मानले.
