शिक्रापूर: शिक्रापूर (ता. शिरुर) येथील फिनिक्स सोसायटी येथे राहणाऱ्या रुपाली टाक या ७ ऑगस्ट रोजी सायंकाळच्या सुमारास काही कामानिमित्ताने घराला कुलूप लावून बाहेरगावी गेलेल्या होत्या. दुसऱ्या दिवशी रुपाली या घरी आल्या असता त्यांना दरवाजाचे कुलूप तुटलेले दिसले. त्यामुळे त्यांनी घरात पाहणी केली असता घरातील कपाट उघडे व साहित्य अस्ताव्यस्थ पडल्याचे त्यांना दिसले. त्यामुळे त्यांनी कपाटाची पाहणी केली असता कपाटातील सोन्याचे व चांदीचे दागिने व रोख २५ हजार रुपये असा ९० हजार रुपयांचा ऐवज चोरट्यांनी चोरुन नेल्याचे निदर्शनास आले.
याबाबत रुपाली सतीष टाक (वय ३२) रा. फिनिक्स सोसायटी शिक्रापूर (ता. शिरुर) जि. पुणे मूळ रा. हिरापूर ता. गेवराई जि. बीड यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी अज्ञात चोरट्यांवर गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली पोलीस हवालदार मंगेश लांडगे हे करत आहे.
