शिरुर तालुक्यातील कोरेगाव भीमा येथील खळबळजनक घटना
शिक्रापूर: कोरेगाव भीमा (ता. शिरुर) येथील एक कुटुंब देवदर्शनासाठी बाहेरगावी गेलेला असताना अज्ञात चोरट्यांनी सदर घरावर डल्ला मारुन घरातील ६० हजार रुपये लंपास केल्याची घटना घडली असल्याने शिक्रापूर पोलीस स्टेशन येथे अज्ञात युवकांवर गुन्हे दाखल करण्यात आले आहे.
कोरेगाव भीमा (ता. शिरुर) येथील अनिल भालेराव हे त्यांच्या संपूर्ण कुटुंबीयांसह देवदर्शनासाठी बाहेर गावी गेले होते. (२३) जून रोजी रात्रीच्या सुमारास भालेराव हे रात्री अडीच वाजण्याच्या सुमारास देवदर्शन हून घरी आले असता त्यांच्या घरासमोर एक अज्ञात युवक उभा होता. भालेराव यांची कार घरासमोर येताच सदर युवकासह भालेराव यांच्या घरातून २ असे तिन युवक पळून जावू लागले. त्यावेळी भालेराव यांच्या सह सर्वांनी त्या युवकांचा पाठलाग केला. मात्र तिघे युवक पळून गेले. त्यामुळे भालेराव यांनी घराची पाहणी केली असता अज्ञात युवकांनी त्यांच्या दरवाजाचे कुलूप तोडून कपाटाचा दरवाजा उघडून कपाटातील तब्बल ६० हजार रुपयांवर अज्ञात तिघा चोरट्यांनी डल्ला मारल्याचे समोर आले.
याबाबत अनिल सदाशिव भालेराव (वय २८) रा. कोरेगाव भीमा (ता. शिरुर) जि. पुणे यांनी शिक्रापूर पोलीस स्टेशन येथे फिर्याद दिली असल्याने शिक्रापूर पोलिसांनी ३ अज्ञात युवकांवर गुन्हे दाखल केले असून सदर गुन्ह्याचा पुढील तपास पोलीस निरीक्षक हेमंत शेडगे यांच्या मार्गदर्शनाखाली सहाय्यक पोलीस उपनिरीक्षक अविनाश थोरात हे करत आहे.
